ye bhi nahin ki un se mohabbat nahin rahi

ye bhī nahīñ ki un se mohabbat nahīñ rahī

ye bhī hai sach ki diid kī hasrat nahīñ rahī

dil un kī is adā se bhī mānūs ho gayā

ab jaur-e-be-ruḳhī kī shikāyat nahīñ rahī

donoñ badalte vaqt ke sāñche meñ Dhal ga.e

vo dil nahīñ rahā vo tabī.at nahīñ rahī

kyā dekhte haiñ dekh ke pesh-e-nazar unheñ

goyā nigah meñ diid kī tāqat nahīñ rahī

ab ḳhvāb hī meñ un se mulāqāt ho to ho

milne kī un kī aur to sūrat nahīñ rahī

jab kuchh na the ḳhayāl thā nām-o-numūd kā

ab kuchh hue to ḳhvāhish-e-shohrat nahīñ rahī

sad-haif zarf valvala-e-dil ke bāvajūd

pahlī sī vo jasārat-o-jur.at nahīñ rahī

insāniyat ke naam kā charchā to hai magar

insāniyat amal se ibārat nahīñ rahī

dekh ai 'rishī' kamāl-e-fusūn-e-jadīdiyat

ab ehtirām-e-fan kī zarūrat nahīñ rahī

ye bhi nahin ki un se mohabbat nahin rahi

ye bhi hai sach ki did ki hasrat nahin rahi

dil un ki is ada se bhi manus ho gaya

ab jaur-e-be-ruKHi ki shikayat nahin rahi

donon badalte waqt ke sanche mein Dhal gae

wo dil nahin raha wo tabiat nahin rahi

kya dekhte hain dekh ke pesh-e-nazar unhen

goya nigah mein did ki taqat nahin rahi

ab KHwab hi mein un se mulaqat ho to ho

milne ki un ki aur to surat nahin rahi

jab kuchh na the KHayal tha nam-o-numud ka

ab kuchh hue to KHwahish-e-shohrat nahin rahi

sad-haif zarf walwala-e-dil ke bawajud

pahli si wo jasarat-o-jurat nahin rahi

insaniyat ke nam ka charcha to hai magar

insaniyat amal se ibarat nahin rahi

dekh ai 'rishi' kamal-e-fusun-e-jadidiyat

ab ehtiram-e-fan ki zarurat nahin rahi