ye dastan-e-dil hai kya ho ada zaban se

ye dāstān-e-dil hai kyā ho adā zabāñ se

aañsū Tapak rahe haiñ lafzeñ mileñ kahāñ se

hai rabt do diloñ ko be-rabtī-e-bayāñ se

kuchh vo kaheñ nazar se kuchh ham kaheñ zabāñ se

ye rote rote hañsnā tartīb-e-zikr-e-ġham hai

aayā huuñ ibtidā par chheḌā thā darmiyāñ se

hāsil to zindagī kā thī zindagī yahīñ kī

ab maiñ huuñ ik janāza uThvā do āstāñ se

is tūl-e-ḳhāmushī kā zor-e-bayāñ bhī dekhā

thī baat mere dil kī niklī tirī zabāñ se

jab husn ḳhud-numā hai aur ishq raḳhna-afgan

is kashmakash meñ parda niklegā darmiyāñ se

maidān-e-imtihān meñ ai be-ġharaz mohabbat

dil kī zamīn tū ne Takrā dī āsmāñ se

us rāzdār-e-ġham kī hālat na pūchh jis ko

kahnā to hai bahut kuchh mahrūm hai zabāñ se

ai jazb-e-shauq-e-manzil mamnūn-e-ġhair kyuuñ hoñ

ḳhud rāsta badal kar bichhḌā huuñ kārvāñ se

har gaam par ThiThaknā har baar muḌ ke taknā

o muskurāne vaale kyā le chalā yahāñ se

zāhir fareb-e-va.ada phir e'tibār itnā

vo likh gayā diloñ par jo kah diyā zabāñ se

ā.ankhoñ se bāġhbāñ kī sho.ale nikle rahe haiñ

tinke dabā.e muñh meñ niklā huuñ āshiyāñ se

dil kā sakūñ gañvā kar hoñ aarzū pashemāñ

kuchh le ke rakh na chhoḌā kyuuñ jins-e-rā.egāñ se

ye dastan-e-dil hai kya ho ada zaban se

aansu Tapak rahe hain lafzen milen kahan se

hai rabt do dilon ko be-rabti-e-bayan se

kuchh wo kahen nazar se kuchh hum kahen zaban se

ye rote rote hansna tartib-e-zikr-e-gham hai

aaya hun ibtida par chheDa tha darmiyan se

hasil to zindagi ka thi zindagi yahin ki

ab main hun ek janaza uThwa do aastan se

is tul-e-KHamushi ka zor-e-bayan bhi dekha

thi baat mere dil ki nikli teri zaban se

jab husn KHud-numa hai aur ishq raKHna-afgan

is kashmakash mein parda niklega darmiyan se

maidan-e-imtihan mein ai be-gharaz mohabbat

dil ki zamin tu ne Takra di aasman se

us raazdar-e-gham ki haalat na puchh jis ko

kahna to hai bahut kuchh mahrum hai zaban se

ai jazb-e-shauq-e-manzil mamnun-e-ghair kyun hon

KHud rasta badal kar bichhDa hun karwan se

har gam par ThiThakna har bar muD ke takna

o muskurane wale kya le chala yahan se

zahir fareb-e-wada phir e'tibar itna

wo likh gaya dilon par jo kah diya zaban se

aaankhon se baghban ki shoale nikle rahe hain

tinke dabae munh mein nikla hun aashiyan se

dil ka sakun ganwa kar hon aarzu pasheman

kuchh le ke rakh na chhoDa kyun jins-e-raegan se