ye dam uske waqt-e-ruKHsat ba-sad-iztirab ulTa

ye dam us ke vaqt-e-ruḳhsat ba-sad-iztirāb ulTā

ki ba-sū-e-dil mizha se vahīñ ḳhūn-e-nāb ulTā

sar-e-lauh us kī sūrat kahīñ likh gayā thā maanī

use dekh kar na maiñ ne varaq-e-kitāb ulTā

maiñ ajab ye rasm dekhī mujhe roz-e-īd-e-qurbāñ

vahī zab.h bhī kare aur vahī le savāb ulTā

ye ulaT ga.ī hai qismat ki jo dil kisī ko duuñ maiñ

vo mire hī sar se maare use kar ḳharāb ulTā

ye naqāb-posh zālim koī zor hai ki jis ne

kiye ḳhuun saikḌoñ aur na zarā naqāb ulTā

jo ba-vaqt-e-ġhusl apnā vo phirā le mauj se muñh

to phirāte hī muñh us ke lage bahne aab ulTā

maiñ likhā hai ḳhat to qāsid pa ye hogā mujh pe ehsāñ

inhīñ paañv aa.egā tū jo liye javāb ulTā

tire aage mehr-e-tābāñ hai zamīñ pe sar-ba-sajda

ye varaq kā ganjafe ke nahīñ āftāb ulTā

nahīñ jā-e-shikva us se hameñ 'mus.hafī' hamesha

ye zamāne kā rahā hai yūñhī inqalāb ulTā

ye dam us ke waqt-e-ruKHsat ba-sad-iztirab ulTa

ki ba-su-e-dil mizha se wahin KHun-e-nab ulTa

sar-e-lauh us ki surat kahin likh gaya tha mani

use dekh kar na main ne waraq-e-kitab ulTa

main ajab ye rasm dekhi mujhe roz-e-id-e-qurban

wahi zabh bhi kare aur wahi le sawab ulTa

ye ulaT gai hai qismat ki jo dil kisi ko dun main

wo mere hi sar se mare use kar KHarab ulTa

ye naqab-posh zalim koi zor hai ki jis ne

kiye KHun saikDon aur na zara naqab ulTa

jo ba-waqt-e-ghusl apna wo phira le mauj se munh

to phiraate hi munh us ke lage bahne aab ulTa

main likha hai KHat to qasid pa ye hoga mujh pe ehsan

inhin panw aaega tu jo liye jawab ulTa

tere aage mehr-e-taban hai zamin pe sar-ba-sajda

ye waraq ka ganjafe ke nahin aaftab ulTa

nahin ja-e-shikwa us se hamein 'mushafi' hamesha

ye zamane ka raha hai yunhi inqalab ulTa