ye dard-e-hijr aur is par sahar nahin hoti

ye dard-e-hijr aur is par sahar nahīñ hotī

kahīñ idhar kī to duniyā udhar nahīñ hotī

na ho rihā.ī qafas se agar nahīñ hotī

nigāh-e-shauq to be-bāl-o-par nahīñ hotī

satā.e jaao nahīñ koī pūchhne vaalā

miTā.e jaao kisī ko ḳhabar nahīñ hotī

nigāh-e-barq alāva mire nasheman ke

chaman kī aur kisī shāḳh par nahīñ hotī

qafas meñ ḳhauf hai sayyād kā na barq kā Dar

kabhī ye baat nasīb apne ghar nahīñ hotī

manāne aa.e ho duniyā meñ jab se ruuTh gayā

ye aisī baat hai jo darguzar nahīñ hotī

phiruñgā hashr meñ kis kis se pūchhtā tum ko

vahāñ kisī ko kisī kī ḳhabar nahīñ hotī

kisī ġharīb ke naale haiñ aap kyuuñ chauñke

huzūr shab ko azān-e-sahar nahīñ hotī

ye maanā aap qasam khā rahe haiñ va.adoñ par

dil-e-hazīñ ko tasallī magar nahīñ hotī

tumhīñ duā.eñ karo kuchh marīz-e-ġham ke liye

ki ab kisī kī duā kārgar nahīñ hotī

bas aaj raat ko tīmārdār so jaa.eñ

marīz ab na kahegā sahar nahīñ hotī

'qamar' ye shām-e-firāq aur iztirāb-e-sahar

abhī to chār-pahar tak sahar nahīñ hotī

ye dard-e-hijr aur is par sahar nahin hoti

kahin idhar ki to duniya udhar nahin hoti

na ho rihai qafas se agar nahin hoti

nigah-e-shauq to be-baal-o-par nahin hoti

satae jao nahin koi puchhne wala

miTae jao kisi ko KHabar nahin hoti

nigah-e-barq alawa mere nasheman ke

chaman ki aur kisi shaKH par nahin hoti

qafas mein KHauf hai sayyaad ka na barq ka Dar

kabhi ye baat nasib apne ghar nahin hoti

manane aae ho duniya mein jab se ruTh gaya

ye aisi baat hai jo darguzar nahin hoti

phirunga hashr mein kis kis se puchhta tum ko

wahan kisi ko kisi ki KHabar nahin hoti

kisi gharib ke nale hain aap kyun chaunke

huzur shab ko azan-e-sahar nahin hoti

ye mana aap qasam kha rahe hain wadon par

dil-e-hazin ko tasalli magar nahin hoti

tumhin duaen karo kuchh mariz-e-gham ke liye

ki ab kisi ki dua kargar nahin hoti

bas aaj raat ko timardar so jaen

mariz ab na kahega sahar nahin hoti

'qamar' ye sham-e-firaq aur iztirab-e-sahar

abhi to chaar-pahar tak sahar nahin hoti