ye dil aawezi-e-hayat na ho

ye dil āvezī-e-hayāt na ho

agar āhañg-e-hādsāt na ho

terī nārāzgī qubūl magar

ye bhī kyā bhuul kar bhī baat na ho

ziist meñ vo ghaḌī na aa.e ki jab

haat meñ mere terā haat na ho

hañsne vaale rulā na auroñ ko

sub.h terī kisī kī raat na ho

ishq bhī kaam kī hai chiiz agar

yahī bas dil kī kā.enāt na ho

kaun us kī jafā kī laa.e taab

gaahe gaahe jo iltifāt na ho

rind kuchh kar rahe haiñ sargoshī

zikr-e-'mullā' se ḳhush-sifāt na ho

ye dil aawezi-e-hayat na ho

agar aahang-e-hadsat na ho

teri naraazgi qubul magar

ye bhi kya bhul kar bhi baat na ho

zist mein wo ghaDi na aae ki jab

hat mein mere tera hat na ho

hansne wale rula na auron ko

subh teri kisi ki raat na ho

ishq bhi kaam ki hai chiz agar

yahi bas dil ki kaenat na ho

kaun us ki jafa ki lae tab

gahe gahe jo iltifat na ho

rind kuchh kar rahe hain sargoshi

zikr-e-'mulla' se KHush-sifat na ho