ye dil ab mujhse thoDi der sustane ko kahta hai

ye dil ab mujh se thoḌī der sustāne ko kahtā hai

aur āñhkeñ muuñd kar har baat dohrāne ko kahtā hai

hamārī gumrahī kī baat hī chhoḌo ki har jaada

kahīñ tak ḳhud ko ab ham se hī pahuñchāne ko kahtā hai

rahī ho vaj.h koī bhī alag to ho ga.e the sab

ye mujh meñ kaun phir sab ko bulā laane ko kahtā hai

mirī mushkil ko lekin koī jaane bhī to kyā jaane

qadam jo bhī baḌhātā huuñ palaT aane ko kahtā hai

rahā yuuñ umr bhar jā-e-amāñ paane ko sar-gardāñ

mirā saaya bhī ab mujh meñ samā jaane ko kahtā hai

bahut arsa huā mahsūs tak ham ko kiye aisā

koī ham ko akelā chhoḌ kar jaane ko kahtā hai

kahīñ ham aa.eñ jaa.eñ to zarā khul jaa.eñ bhī ḳhud par

yahāñ har saañs jaise ḳhud se katrāne ko kahtā hai

idhar sach hai akelā chal rahā hai khoyā khoyā sā

barābar chal rahā hai jhuuT apnāne ko kahtā hai

yahīñ ham ghar meñ hote haiñ to phir kyuuñ 'talḳh' aisā hai

har ik lamha hameñ jis tarah ghar aane ko kahtā hai

ye dil ab mujh se thoDi der sustane ko kahta hai

aur aanhken mund kar har baat dohrane ko kahta hai

hamari gumrahi ki baat hi chhoDo ki har jada

kahin tak KHud ko ab hum se hi pahunchane ko kahta hai

rahi ho wajh koi bhi alag to ho gae the sab

ye mujh mein kaun phir sab ko bula lane ko kahta hai

meri mushkil ko lekin koi jaane bhi to kya jaane

qadam jo bhi baDhata hun palaT aane ko kahta hai

raha yun umr bhar ja-e-aman pane ko sar-gardan

mera saya bhi ab mujh mein sama jaane ko kahta hai

bahut arsa hua mahsus tak hum ko kiye aisa

koi hum ko akela chhoD kar jaane ko kahta hai

kahin hum aaen jaen to zara khul jaen bhi KHud par

yahan har sans jaise KHud se katrane ko kahta hai

idhar sach hai akela chal raha hai khoya khoya sa

barabar chal raha hai jhuT apnane ko kahta hai

yahin hum ghar mein hote hain to phir kyun 'talKH' aisa hai

har ek lamha hamein jis tarah ghar aane ko kahta hai