ye dil fareb-e-tamanna mein be-qarar kiya

ye dil fareb-e-tamannā meñ be-qarār kiyā

yahī hai jurm jise ham ne bār-bār kiyā

na ham ne sūd-o-ziyāñ dekh kar mohabbat kī

na nafratoñ kā kabhī ham ne kārobār kiyā

shikasta-rūh sulagtī nigah dil-e-mahjūr

na pūchh kaise har ik zaḳhm kā shumār kiyā

tire jamāl-e-nazar ne diyā fareb hameñ

usī fareb-e-nazar ne hai ashk-bār kiyā

navā-e-sub.h-e-azal terī chaah meñ ham ne

na pūchh dast-e-ḳhamoshāñ ko kaise paar kiyā

nazar na aa.ī haqīqat majāz kī sūrat

nigāh-e-shauq ne paiham ye intizār kiyā

girī thī barq-e-tajallī jo qalb par mere

usī ne rāz-e-haqīqat ko āshkār kiyā

sahar kī aas meñ guzrī 'sabā' ye umr tamām

harīm-e-zīst kā zulmat ne yuuñ hisār kiyā

ye dil fareb-e-tamanna mein be-qarar kiya

yahi hai jurm jise hum ne bar-bar kiya

na hum ne sud-o-ziyan dekh kar mohabbat ki

na nafraton ka kabhi hum ne karobar kiya

shikasta-ruh sulagti nigah dil-e-mahjur

na puchh kaise har ek zaKHm ka shumar kiya

tere jamal-e-nazar ne diya fareb hamein

usi fareb-e-nazar ne hai ashk-bar kiya

nawa-e-subh-e-azal teri chah mein hum ne

na puchh dast-e-KHamoshan ko kaise par kiya

nazar na aai haqiqat majaz ki surat

nigah-e-shauq ne paiham ye intizar kiya

giri thi barq-e-tajalli jo qalb par mere

usi ne raaz-e-haqiqat ko aashkar kiya

sahar ki aas mein guzri 'saba' ye umr tamam

harim-e-zist ka zulmat ne yun hisar kiya