ye dil mera mere pahlu se anqarib chala

ye dil mirā mire pahlū se anqarīb chalā

shikast khā ke ġhamoñ se mirā raqīb chalā

jab un kī bazm se uTh kar koī ġharīb chalā

fazā.eñ chīḳh uThīñ husn kā naqīb chalā

vo phir sameT ke bāñhoñ meñ kā.enāt kā rañg

gale surāhī se mil kar mirā habīb chalā

jahāñ jahāñ mutasādim huī junūñ se ḳhirad

baḌī adā se vahāñ ḳhāma-e-adīb chalā

chhalakne vaalā hai shāyad mirī hayāt kā jaam

ye laḌkhaḌātā huā kyoñ mirā tabīb chalā

masā.il-e-ġham-e-hastī ko aur uljhāne

vo 'hosh' jānib-e-manzil koī ḳhatīb chalā

ye dil mera mere pahlu se anqarib chala

shikast kha ke ghamon se mera raqib chala

jab un ki bazm se uTh kar koi gharib chala

fazaen chiKH uThin husn ka naqib chala

wo phir sameT ke banhon mein kaenat ka rang

gale surahi se mil kar mera habib chala

jahan jahan mutasadim hui junun se KHirad

baDi ada se wahan KHama-e-adib chala

chhalakne wala hai shayad meri hayat ka jam

ye laDkhaData hua kyon mera tabib chala

masail-e-gham-e-hasti ko aur uljhane

wo 'hosh' jaanib-e-manzil koi KHatib chala