ye din bahaar ke ab ke bhi ras aa na sake

ye din bahār ke ab ke bhī raas aa na sake

ki ġhunche khil to sake khil ke muskurā na sake

mirī tabāhī-e-dil par to rahm khā na sake

jo raushnī meñ rahe raushnī ko pā na sake

na jaane aah ki un āñsuoñ pe kyā guzrī

jo dil se aañkh tak aa.e mizha tak aa na sake

rah-e-ḳhulūs-e-mohabbat ke hādsāt-e-jahāñ

mujhe to kyā mire naqsh-e-qadam miTā na sake

kareñge mar ke baqā-e-davām kyā hāsil

jo zinda rah ke maqām-e-hayāt pā na sake

nayā zamāna banāne chale the dīvāne

na.ī zamīn nayā āsmāñ banā na sake

ye din bahaar ke ab ke bhi ras aa na sake

ki ghunche khil to sake khil ke muskura na sake

meri tabahi-e-dil par to rahm kha na sake

jo raushni mein rahe raushni ko pa na sake

na jaane aah ki un aansuon pe kya guzri

jo dil se aankh tak aae mizha tak aa na sake

rah-e-KHulus-e-mohabbat ke hadsat-e-jahan

mujhe to kya mere naqsh-e-qadam miTa na sake

karenge mar ke baqa-e-dawam kya hasil

jo zinda rah ke maqam-e-hayat pa na sake

naya zamana banane chale the diwane

nai zamin naya aasman bana na sake