ye din ye raat ye sham-o-sahar sameT liye

ye din ye raat ye shām-o-sahar sameT liye

ġhazal ke shauq ne kitne pahar sameT liye

fazā meñ aisā ta.assub kā zahr phail gayā

na jaane kitne parindoñ ne par sameT liye

samāj terī marammat na ho sakegī kahīñ

jo ham ġharīboñ ne dast-o-hunar sameT liye

ye soch kar ki añdhere na zindagī ban jaa.eñ

jahāñ jahāñ mile shams-o-qamar sameT liye

bikher paa.e na ham rāstoñ meñ phuul magar

mile jo ḳhaar sar-e-rah-guzar sameT liye

patā batā.egā ab vaqt un kī manzil kā

musāfiroñ ne to rakhte safar sameT liye

samajh meñ aa ga.ī 'shāhid' agar koī bhī radīf

jo qāfiya bhī lage mo'atabar sameT liye

ye din ye raat ye sham-o-sahar sameT liye

ghazal ke shauq ne kitne pahar sameT liye

faza mein aisa tassub ka zahr phail gaya

na jaane kitne parindon ne par sameT liye

samaj teri marammat na ho sakegi kahin

jo hum gharibon ne dast-o-hunar sameT liye

ye soch kar ki andhere na zindagi ban jaen

jahan jahan mile shams-o-qamar sameT liye

bikher pae na hum raston mein phul magar

mile jo KHar sar-e-rah-guzar sameT liye

pata bataega ab waqt un ki manzil ka

musafiron ne to rakhte safar sameT liye

samajh mein aa gai 'shahid' agar koi bhi radif

jo qafiya bhi lage mo'atabar sameT liye