ye falak ye mah-o-anjum ye zamin ye zamana

ye falak ye māh-o-anjum ye zamīn ye zamāna

tire husn kī hikāyat mire ishq kā fasāna

ye hai ishq kī karāmat ye kamāl-e-shā.irāna

abhī muñh se baat niklī abhī ho ga.ī fasāna

ye mirā payām kahnā tū sabā muaddabāna

ki guzar gayā hai pyāre tujhe dekhe ik zamāna

mujhe chāk-e-jeb-o-dāman se nahīñ munāsibat kuchh

ye junūñ hī ko mubārak rah-o-rasm-e-āmiyāna

tujhe hādsāt-e-paiham se bhī kyā milegā nādāñ

tirā dil agar ho zinda to nafas bhī tāziyāna

vo adā-e-dilbarī ho ki navā-e-āshiqāna

jo diloñ ko fat.h kar le vahī fāteh-e-zamāna

ye falak ye mah-o-anjum ye zamin ye zamana

tere husn ki hikayat mere ishq ka fasana

ye hai ishq ki karamat ye kamal-e-shairana

abhi munh se baat nikli abhi ho gai fasana

ye mera payam kahna tu saba muaddabana

ki guzar gaya hai pyare tujhe dekhe ek zamana

mujhe chaak-e-jeb-o-daman se nahin munasibat kuchh

ye junun hi ko mubarak rah-o-rasm-e-amiyana

tujhe hadsat-e-paiham se bhi kya milega nadan

tera dil agar ho zinda to nafas bhi taziyana

wo ada-e-dilbari ho ki nawa-e-ashiqana

jo dilon ko fath kar le wahi fateh-e-zamana