ye ghaTaon ka taqaza hai ki saqi mai la

ye ghaTāoñ kā taqāza hai ki saaqī mai lā

aaj mai-ḳhāroñ kā bhī dast-e-talab hai phailā

baat qismat kī hai shikva bhī kareñ to kis se

ham ko hamdard mile aise ki dil hai mailā

sāġhar-e-mai jo nahīñ hai na sahī zahr sahī

sāqiyā dil mirā muztar hai koī bhī shai lā

koī nākām sidhārā hai jahāñ se shāyad

'ālam-e-'ishq meñ jo aaj hai ye vāvailā

bandagī meñ tujhe lazzat jo mayassar na huī

tū bhī mailā hai tirā dil bhī hai zāhid mailā

'ishq kī raah bhī āsān nahīñ hai 'salmān'

rahā nākām jo majnūñ to pareshāñ lailā

ye ghaTaon ka taqaza hai ki saqi mai la

aaj mai-KHaron ka bhi dast-e-talab hai phaila

baat qismat ki hai shikwa bhi karen to kis se

hum ko hamdard mile aise ki dil hai maila

saghar-e-mai jo nahin hai na sahi zahr sahi

saqiya dil mera muztar hai koi bhi shai la

koi nakaam sidhaara hai jahan se shayad

'alam-e-'ishq mein jo aaj hai ye wawaila

bandagi mein tujhe lazzat jo mayassar na hui

tu bhi maila hai tera dil bhi hai zahid maila

'ishq ki rah bhi aasan nahin hai 'salman'

raha nakaam jo majnun to pareshan laila