ye hadisa bhi sar-e-rahguzar hona tha

ye hādisa bhī sar-e-rahguzār honā thā

tirī talāsh meñ mujh ko ġhubār honā thā

uchak liyā hai unheñ bhī ḳhizāñ ke mausam ne

vo phūl-pāt ki jin ko bahār honā thā

hameñ ḳhabar thī tirī tarz-e-bādshāhī se

hunar-varo.v ko hī be-iḳhtiyār honā thā

unhī ke haath garebān meñ paḌe hue haiñ

jinheñ sadā se hī ḳhidmat-guzār honā thā

gumāñ kī dhuul mire dil pe mal gayā hai vahī

vo shaḳhs jis ko mirā e'tibār honā thā

bharosa ġhair kī chhāñv pe ham na karte agar

saroñ pe sāya-e-parvardigār honā thā

badal diyā unheñ miTTī ke bartanoñ meñ 'nabīl'

vo chīzeñ jin ko bahut pā.edār honā thā

ye hadisa bhi sar-e-rahguzar hona tha

teri talash mein mujh ko ghubar hona tha

uchak liya hai unhen bhi KHizan ke mausam ne

wo phul-pat ki jin ko bahaar hona tha

hamein KHabar thi teri tarz-e-baadshahi se

hunar-warow ko hi be-iKHtiyar hona tha

unhi ke hath gareban mein paDe hue hain

jinhen sada se hi KHidmat-guzar hona tha

guman ki dhul mere dil pe mal gaya hai wahi

wo shaKHs jis ko mera e'tibar hona tha

bharosa ghair ki chhanw pe hum na karte agar

saron pe saya-e-parwardigar hona tha

badal diya unhen miTTi ke bartanon mein 'nabil'

wo chizen jin ko bahut paedar hona tha