ye humse puchhte ho ranj-e-imtihan kya hai

ye ham se pūchhte ho ranj-e-imtihāñ kyā hai

tumhīñ kaho sila-e-ḳhūn-e-kushtagāñ kyā hai

asīr-e-band-e-ḳhizāñ huuñ na pūchh ai sayyād

ḳhirām kyā hai sabā kyā hai gulsitāñ kyā hai

huī hai umr ki dil ko nazar se rabt nahīñ

magar ye silsila-e-chashm-e-ḳhūñ-fishāñ kyā hai

nazar uThe to na samjhūñ jhuke to kyā samjhūñ

sukūt-e-nāz ye paira-e-bayāñ kyā hai

baheñ na aañkh se aañsū to naġhmagī be-sūd

khileñ na phuul to rañgīni-e-fuġhāñ kyā hai

nigāh-e-yās tire haath hai bharam dil kā

kahīñ vo jaan na leñ ishq kī zabāñ kyā hai

ye aur baat ki ham tum ko bevafā na kaheñ

magar ye jānte haiñ jaur-e-āsmāñ kyā hai

maiñ shikva-sanj nahīñ apnī tīra-baḳhtī kā

magar batāo to ye sub.h-e-zar-fishāñ kyā hai

ye hum se puchhte ho ranj-e-imtihan kya hai

tumhin kaho sila-e-KHun-e-kushtagan kya hai

asir-e-band-e-KHizan hun na puchh ai sayyaad

KHiram kya hai saba kya hai gulsitan kya hai

hui hai umr ki dil ko nazar se rabt nahin

magar ye silsila-e-chashm-e-KHun-fishan kya hai

nazar uThe to na samjhun jhuke to kya samjhun

sukut-e-naz ye paira-e-bayan kya hai

bahen na aankh se aansu to naghmagi be-sud

khilen na phul to rangini-e-fughan kya hai

nigah-e-yas tere hath hai bharam dil ka

kahin wo jaan na len ishq ki zaban kya hai

ye aur baat ki hum tum ko bewafa na kahen

magar ye jaante hain jaur-e-asman kya hai

main shikwa-sanj nahin apni tira-baKHti ka

magar batao to ye subh-e-zar-fishan kya hai