ye inqalab bhi ai daur-e-asman ho jae

ye inqalāb bhī ai daur-e-āsmāñ ho jaa.e

mirā qafas bhī muqaddar se āshiyāñ ho jaa.e

ma.āl-e-zabt-e-fuġhāñ marg-e-nā-gahāñ ho jaa.e

kisī tarah to mukammal ye dāstāñ ho jaa.e

samajh to leñge vo mujh se agar bayāñ ho jaa.e

sukūt had se guzar jaa.e to ziyāñ ho jaa.e

qafas se duur sahī mausam-e-bahār to hai

asīro aao zarā zikr-e-āshiyāñ ho jaa.e

diyā hai dard to rañg-e-qubūl de aisā

jo ashk aañkh se Tapke vo dāstāñ ho jaa.e

zabān-e-ḳhushk bhī jumbish meñ lā nahīñ sakte

ye bebasī bhī na minjumla-e-fuġhāñ ho jaa.e

qafas bhī bigḌī huī shakl hai nasheman kī

ye ghar jo phir se sañvar jaa.e āshiyāñ ho jaa.e

nigāh-e-garm se dekho na ashk-e-hasrat ko

ye chāhte ho ki ye os bhī dhuāñ ho jaa.e

hayāt nok-e-mizha tak hai ashk-e-rañgīñ kī

palak zarā sī bhī jhapke to rā.egāñ ho jaa.e

'sirāj' dekh lo be-āñsuoñ ke bhī ro ke

ye sa.ī bhī na kahīñ sa.ī-e-rā.egāñ ho jaa.e

ye inqalab bhi ai daur-e-asman ho jae

mera qafas bhi muqaddar se aashiyan ho jae

maal-e-zabt-e-fughan marg-e-na-gahan ho jae

kisi tarah to mukammal ye dastan ho jae

samajh to lenge wo mujh se agar bayan ho jae

sukut had se guzar jae to ziyan ho jae

qafas se dur sahi mausam-e-bahaar to hai

asiro aao zara zikr-e-ashiyan ho jae

diya hai dard to rang-e-qubul de aisa

jo ashk aankh se Tapke wo dastan ho jae

zaban-e-KHushk bhi jumbish mein la nahin sakte

ye bebasi bhi na minjumla-e-fughan ho jae

qafas bhi bigDi hui shakl hai nasheman ki

ye ghar jo phir se sanwar jae aashiyan ho jae

nigah-e-garm se dekho na ashk-e-hasrat ko

ye chahte ho ki ye os bhi dhuan ho jae

hayat nok-e-mizha tak hai ashk-e-rangin ki

palak zara si bhi jhapke to raegan ho jae

'siraj' dekh lo be-ansuon ke bhi ro ke

ye sai bhi na kahin sai-e-raegan ho jae