ye inqalab hua jaane runuma kaise

ye inqalāb huā jaane rūnumā kaise

badal ga.e tirī mahfil meñ āshnā kaise

tumhārī bazm meñ āḳhir maiñ luT gayā kaise

ye sāneha to huā hai magar huā kaise

zarā ye dekh ki mere sujūd-e-paiham se

miTā to naqsh-e-kaf-e-pā magar miTā kaise

vafā kā ġhair kī bhī imtihān ho jaa.e

hamāre hote hue us ne ye kahā kaise

uThāne vaale hameñ bazm se zarā ye dekh

ki TūTtā hai ġharīboñ kā aasrā kaise

maiñ koī qatra-e-shabnam thā tābish-e-ruḳh se

vajūd-e-harf-e-ġhalat kī tarah miTā kaise

hai 'aish' saath koī rāhbar na hamrāhī

kaTegī dekhiye tanhā rah-e-vafā kaise

ye inqalab hua jaane runuma kaise

badal gae teri mahfil mein aashna kaise

tumhaari bazm mein aaKHir main luT gaya kaise

ye saneha to hua hai magar hua kaise

zara ye dekh ki mere sujud-e-paiham se

miTa to naqsh-e-kaf-e-pa magar miTa kaise

wafa ka ghair ki bhi imtihan ho jae

hamare hote hue us ne ye kaha kaise

uThane wale hamein bazm se zara ye dekh

ki TuTta hai gharibon ka aasra kaise

main koi qatra-e-shabnam tha tabish-e-ruKH se

wajud-e-harf-e-ghalat ki tarah miTa kaise

hai 'aish' sath koi rahbar na hamrahi

kaTegi dekhiye tanha rah-e-wafa kaise