ye jahan bargah-e-ritl-giran hai saqi

ye jahāñ bārgah-e-ritl-girāñ hai saaqī

ik jahannam mire siine meñ tapāñ hai saaqī

jis ne barbād kiyā mā.il-e-fariyād kiyā

vo mohabbat abhī is dil meñ javāñ hai saaqī

ek din aadam o havvā bhī kiye the paidā

vo uḳhuvvat tirī mahfil meñ kahāñ hai saaqī

har chaman dāman-e-gul-rañg hai ḳhūn-e-dil se

har taraf shevan-o-fariyād-o-fuġhāñ hai saaqī

maah o anjum mire ashkoñ se guhar-tāb hue

kahkashāñ nuur kī ek jū-e-ravāñ hai saaqī

husn hī husn hai jis samt bhī uThtī hai nazar

kitnā pur-kaif ye manzar ye samāñ hai saaqī

zamzama saaz kā paa.el kī chhanāke kī tarah

behtar-az-shorish-e-nāqūs-o-azāñ hai saaqī

mere har lafz meñ betāb mirā shor-e-darūñ

merī har saañs mohabbat kā dhuāñ hai saaqī

ye jahan bargah-e-ritl-giran hai saqi

ek jahannam mere sine mein tapan hai saqi

jis ne barbaad kiya mail-e-fariyaad kiya

wo mohabbat abhi is dil mein jawan hai saqi

ek din aadam o hawwa bhi kiye the paida

wo uKHuwwat teri mahfil mein kahan hai saqi

har chaman daman-e-gul-rang hai KHun-e-dil se

har taraf shewan-o-fariyaad-o-fughan hai saqi

mah o anjum mere ashkon se guhar-tab hue

kahkashan nur ki ek ju-e-rawan hai saqi

husn hi husn hai jis samt bhi uThti hai nazar

kitna pur-kaif ye manzar ye saman hai saqi

zamzama saz ka pael ki chhanake ki tarah

behtar-az-shorish-e-naqus-o-azan hai saqi

mere har lafz mein betab mera shor-e-darun

meri har sans mohabbat ka dhuan hai saqi