ye jazba-e-talab to mera mar na jaega

ye jazba-e-talab to mirā mar na jā.egā

tum bhī agar miloge to jī bhar na jā.egā

ye iltijā duā ye tamannā fuzūl hai

sūkhī nadī ke paas samundar na jā.egā

jis zāviye se chāho mirī samt pheñk do

mujh se mile baġhair ye patthar na jā.egā

dam-bhar ke vāste haiñ bahāreñ sameT lo

vīrāniyoñ ko chhoḌ ke manzar na jā.egā

yuuñ ḳhush hai apne ghar kī fazāoñ ko chhoḌ kar

jaise vo zindagī meñ kabhī ghar na jā.egā

us ko bulandiyoñ meñ musalsal uchhāliye

lekin vo apnī satha se uupar na jā.egā

shahr-e-murād mil bhī gayā ab to kyā 'hayāt'

māyūsiyoñ kā dil se kabhī Dar na jā.egā

ye jazba-e-talab to mera mar na jaega

tum bhi agar miloge to ji bhar na jaega

ye iltija dua ye tamanna fuzul hai

sukhi nadi ke pas samundar na jaega

jis zawiye se chaho meri samt phenk do

mujh se mile baghair ye patthar na jaega

dam-bhar ke waste hain bahaaren sameT lo

viraniyon ko chhoD ke manzar na jaega

yun KHush hai apne ghar ki fazaon ko chhoD kar

jaise wo zindagi mein kabhi ghar na jaega

us ko bulandiyon mein musalsal uchhaaliye

lekin wo apni satha se upar na jaega

shahr-e-murad mil bhi gaya ab to kya 'hayat'

mayusiyon ka dil se kabhi Dar na jaega