ye jo jugnu hain ya sitare hain

ye jo jugnū haiñ yā sitāre haiñ

ham meñ raushan haiñ ye hamāre haiñ

kyā ḳhizāñ kyā bahār kā jhagḌā

jitne mausam haiñ ham ko pyāre haiñ

kis ke ḳhāke meñ ham bhareñ un ko

rang phūloñ se jo utāre haiñ

apne andar kī raakh meñ ab bhī

jalte bujhte se kuchh sharāre haiñ

biij bote haiñ jo havāoñ meñ

kitne ma.asūm vo bichāre haiñ

ḳhvāb-e-fardā se kyā hameñ 'fikrī'

aise ḳhvāboñ se ab kināre haiñ

ye jo jugnu hain ya sitare hain

hum mein raushan hain ye hamare hain

kya KHizan kya bahaar ka jhagDa

jitne mausam hain hum ko pyare hain

kis ke KHake mein hum bharen un ko

rang phulon se jo utare hain

apne andar ki rakh mein ab bhi

jalte bujhte se kuchh sharare hain

bij bote hain jo hawaon mein

kitne masum wo bichaare hain

KHwab-e-farda se kya hamein 'fikri'

aise KHwabon se ab kinare hain