ye jo nang the ye jo nam the mujhe kha gae

ye jo nang the ye jo naam the mujhe khā ga.e

ye ḳhayāl-e-puḳhta jo ḳhaam the mujhe khā ga.e

kabhī apnī aañkh se zindagī pe nazar na kī

vahī zāviye ki jo aam the mujhe khā ga.e

maiñ amiiq thā ki palā huā thā sukūt meñ

ye jo log mahv-e-kalām the mujhe khā ga.e

vo jo mujh meñ ek ikaa.ī thī vo na juḌ sakī

yahī reza reza jo kaam the mujhe khā ga.e

ye ayaañ jo āb-e-hayāt hai ise kyā karūñ

ki nihāñ jo zahr ke jaam the mujhe khā ga.e

vo nagīñ jo ḳhātim-e-zindagī se phisal gayā

to vahī jo mere ġhulām the mujhe khā ga.e

maiñ vo sho.ala thā jise daam se to zarar na thā

pa jo vasvase tah-e-dām the mujhe khā ga.e

jo khulī khulī thiiñ adāvateñ mujhe raas thiiñ

ye jo zahr-e-ḳhand-salām the mujhe khā ga.e

ye jo nang the ye jo nam the mujhe kha gae

ye KHayal-e-puKHta jo KHam the mujhe kha gae

kabhi apni aankh se zindagi pe nazar na ki

wahi zawiye ki jo aam the mujhe kha gae

main amiq tha ki pala hua tha sukut mein

ye jo log mahw-e-kalam the mujhe kha gae

wo jo mujh mein ek ikai thi wo na juD saki

yahi reza reza jo kaam the mujhe kha gae

ye ayan jo aab-e-hayat hai ise kya karun

ki nihan jo zahr ke jam the mujhe kha gae

wo nagin jo KHatim-e-zindagi se phisal gaya

to wahi jo mere ghulam the mujhe kha gae

main wo shoala tha jise dam se to zarar na tha

pa jo waswase tah-e-dam the mujhe kha gae

jo khuli khuli thin adawaten mujhe ras thin

ye jo zahr-e-KHand-salam the mujhe kha gae