ye jo rah rah ke sar-e-dasht hawa chalti hai

ye jo rah rah ke sar-e-dasht havā chaltī hai

kitnī achchhī hai magar kitnā burā chaltī hai

ek aaseb ta.āqub meñ lagā rahtā hai

maiñ jo ruktā huuñ to phir us kī sadā chaltī hai

haa.e vo saañs ki ruktī hai to kyā ruktī hai

haa.e vo aañkh ki chaltī hai to kyā chaltī hai

pesh-ḳhema hai kisī aur na.ī vahshat kā

ye jo itrā ke abhī bād-e-sabā chaltī hai

tiir chalte haiñ lagātār savād-e-jāñ meñ

aur talvār koī ek judā chaltī hai

biich dariyā ke ajab jashn bapā hai yaaro

saath kashtī ke koī mauj-e-balā chaltī hai

aaj kuchh aur hī manzar hai mire chāroñ taraf

ġhair-mahsūs tarīqe se havā chaltī hai

maiñ ba-zāhir to huuñ āsūda pa mere andar

dhīme dhīme se kahīñ āh-o-bukā chaltī hai

yuuñ to bebāk banā phirtā hai vo yāroñ meñ

us kī ā.ankhoñ meñ ajab sharm-o-hayā chaltī hai

mere maulā jo rahe sirf kahā terā rahe

mere hoñToñ pe yahī ek duā chaltī hai

ye jo rah rah ke sar-e-dasht hawa chalti hai

kitni achchhi hai magar kitna bura chalti hai

ek aaseb taaqub mein laga rahta hai

main jo rukta hun to phir us ki sada chalti hai

hae wo sans ki rukti hai to kya rukti hai

hae wo aankh ki chalti hai to kya chalti hai

pesh-KHema hai kisi aur nai wahshat ka

ye jo itra ke abhi baad-e-saba chalti hai

tir chalte hain lagatar sawad-e-jaan mein

aur talwar koi ek juda chalti hai

bich dariya ke ajab jashn bapa hai yaro

sath kashti ke koi mauj-e-bala chalti hai

aaj kuchh aur hi manzar hai mere chaaron taraf

ghair-mahsus tariqe se hawa chalti hai

main ba-zahir to hun aasuda pa mere andar

dhime dhime se kahin aah-o-buka chalti hai

yun to bebak bana phirta hai wo yaron mein

us ki aaankhon mein ajab sharm-o-haya chalti hai

mere maula jo rahe sirf kaha tera rahe

mere honTon pe yahi ek dua chalti hai