ye kahna us se ai qasid jo mahw-e-KHud-parasti hai

ye kahnā us se ai qāsid jo mahv-e-ḳhud-parastī hai

ki tere dekhne ko aañkh muddat se tarastī hai

bane haiñ jab se vo saaqī maze kī mai-parastī hai

idhar mai hai piyāloñ meñ udhar āñkhoñ meñ mastī hai

tirī āñkhoñ ke sadqe ek duniyā un meñ bastī hai

fusūñ hai sehr hai e.ajāz hai shoḳhī hai mastī hai

tabāhī dil meñ rahtī hai ḳharābī dil meñ bastī hai

yahī ābād bastī hai yahī vīrān bastī hai

nigāhoñ se milātā huuñ nigāheñ is tamannā meñ

vo mere dil meñ aa jaa.e jo un āñkhoñ meñ mastī hai

vo jins-e-dil kī qīmat pūchhte haiñ maiñ batā.ūñ kyā

yahī mahñgī sī mahñgī hai yahī sastī sī sastī hai

na sahbā hai na sāġhar hai na miinā hai na ḳhum saaqī

mujhe jo mast kartī hai tirī āñkhoñ kī mastī hai

azal se haq-parastī but-parastī sunte aate haiñ

magar ye aap kā mashrab nirālā ḳhud-parastī hai

javānī ne diye haiñ un ko lā kar ham-nashīñ kyā kyā

adā meñ naaz chitvan meñ hayā āñkhoñ meñ mastī hai

madār-e-zindagī Thahrā nafas kī āmad-o-shud par

havā ke zor se raushan charāġh-e-bazm-e-hastī hai

tamāshā hai mirī rindī ki sāġhar haath meñ le kar

har ik se pūchhtā huuñ maiñ kahīñ thoḌī sī mastī hai

firāq-e-rūh kyūñkar ho gavārā jism-e-insāñ ko

ujaḌ kar phir nahīñ ābād hotī ye vo bastī hai

vo mai-kash huuñ ki aatā hai jo lab par naam tauba kā

to mujh par josh meñ aa kar ghaTā kyā kyā barastī hai

ajab shai jins-e-ulfat hai ki dil jaa.e to haath aa.e

hamesha ek qīmat hai na mahñgī hai na sastī hai

jabhī tak aks qaa.em hai ki ā.īna muqābil ho

hamārī ye haqīqat hai hamārī itnī hastī hai

yaqīñ jaano ki muñh dekhī mohabbat ham nahiñ rakhte

vo ā.īna hai jo vārafta-e-sūrat-parastī hai

bahut jhaTke na de dast-e-junūñ jaib-o-garebāñ ko

rahe tujh ko lihāz is kā purānā raḳht-e-hastī hai

dil-e-āshiq meñ hasrat bhī hai armāñ bhī tamannā bhī

vo jis bastī meñ rahte haiñ baḌī ābād bastī hai

fanā avval bhī thī āḳhir bhī honā hai fanā ham ko

kareñ kyā do adam ke biich meñ ik apnī hastī hai

'jalīl' ustād kā kahnā suno bāñdho kamar tum bhī

ajab bastī madīna hai jahāñ rahmat barastī hai

ye kahna us se ai qasid jo mahw-e-KHud-parasti hai

ki tere dekhne ko aankh muddat se tarasti hai

bane hain jab se wo saqi maze ki mai-parasti hai

idhar mai hai piyalon mein udhar aankhon mein masti hai

teri aankhon ke sadqe ek duniya un mein basti hai

fusun hai sehr hai eajaz hai shoKHi hai masti hai

tabahi dil mein rahti hai KHarabi dil mein basti hai

yahi aabaad basti hai yahi viran basti hai

nigahon se milata hun nigahen is tamanna mein

wo mere dil mein aa jae jo un aankhon mein masti hai

wo jins-e-dil ki qimat puchhte hain main bataun kya

yahi mahngi si mahngi hai yahi sasti si sasti hai

na sahba hai na saghar hai na mina hai na KHum saqi

mujhe jo mast karti hai teri aankhon ki masti hai

azal se haq-parasti but-parasti sunte aate hain

magar ye aap ka mashrab nirala KHud-parasti hai

jawani ne diye hain un ko la kar ham-nashin kya kya

ada mein naz chitwan mein haya aankhon mein masti hai

madar-e-zindagi Thahra nafas ki aamad-o-shud par

hawa ke zor se raushan charagh-e-bazm-e-hasti hai

tamasha hai meri rindi ki saghar hath mein le kar

har ek se puchhta hun main kahin thoDi si masti hai

firaq-e-ruh kyunkar ho gawara jism-e-insan ko

ujaD kar phir nahin aabaad hoti ye wo basti hai

wo mai-kash hun ki aata hai jo lab par nam tauba ka

to mujh par josh mein aa kar ghaTa kya kya barasti hai

ajab shai jins-e-ulfat hai ki dil jae to hath aae

hamesha ek qimat hai na mahngi hai na sasti hai

jabhi tak aks qaem hai ki aaina muqabil ho

hamari ye haqiqat hai hamari itni hasti hai

yaqin jaano ki munh dekhi mohabbat hum nahin rakhte

wo aaina hai jo warafta-e-surat-parasti hai

bahut jhaTke na de dast-e-junun jaib-o-gareban ko

rahe tujh ko lihaz is ka purana raKHt-e-hasti hai

dil-e-ashiq mein hasrat bhi hai arman bhi tamanna bhi

wo jis basti mein rahte hain baDi aabaad basti hai

fana awwal bhi thi aaKHir bhi hona hai fana hum ko

karen kya do adam ke bich mein ek apni hasti hai

'jalil' ustad ka kahna suno bandho kamar tum bhi

ajab basti madina hai jahan rahmat barasti hai