ye kaise jaanta gar shahr mein aaya nahin hota

ye kaise jāntā gar shahr meñ aayā nahīñ hotā

yahāñ dīvār hotī hai magar saaya nahīñ hotā

risālat kī binā gar jhuuT par rakkhī ga.ī hotī

rasūloñ ko bhī to duniyā ne jhuThlāyā nahīñ hotā

ye ḳhvāb-e-sub.h kyā karte tamannā kī hinā-bandī

agar tārīḳh ne apne ko dohrāyā nahīñ hotā

jo amrit chhoḌ kar ham log bhī vish-pān kar lete

to apne ḳhuun meñ ye saañp lahrāyā nahīñ hotā

maiñ apne qatl kā us par kabhī shak bhī nahīñ kartā

agar vo muskurāte vaqt sharmāyā nahīñ hotā

agar kuchh kaam aatī istilāh-e-sāġhar-o-mīnā

to merī tishnagī ne mujh ko bahkāyā nahīñ hotā

janāb-e-'mīr' rote haiñ to 'qaisar' shauq se ro.eñ

hamāre ahd meñ ab koī ham-sāya nahīñ hotā

ye kaise jaanta gar shahr mein aaya nahin hota

yahan diwar hoti hai magar saya nahin hota

risalat ki bina gar jhuT par rakkhi gai hoti

rasulon ko bhi to duniya ne jhuThlaya nahin hota

ye KHwab-e-subh kya karte tamanna ki hina-bandi

agar tariKH ne apne ko dohraya nahin hota

jo amrit chhoD kar hum log bhi wish-pan kar lete

to apne KHun mein ye sanp lahraya nahin hota

main apne qatl ka us par kabhi shak bhi nahin karta

agar wo muskuraate waqt sharmaya nahin hota

agar kuchh kaam aati istilah-e-saghar-o-mina

to meri tishnagi ne mujh ko bahkaya nahin hota

janab-e-'mir' rote hain to 'qaisar' shauq se roen

hamare ahd mein ab koi ham-saya nahin hota