ye karbala hai nazr-e-bala hum hue ki tum

ye karbalā hai nazr-e-balā ham hue ki tum

nāmūs-e-qāfila pe fidā ham hue ki tum

kyuuñ dajla-o-furāt ke da.ave ki nahr par

tishna-dahan shahīd-e-jafā ham hue ki tum

maanā ki sab ajal ke muqābil the sar-ba-kaf

lekin shikār-e-tīr-e-qazā ham hue ki tum

tum bhī fareb-ḳhurda sahī par ba-sad-ḳhulūs

maqtūl-e-makr-o-said-e-daġhā ham hue ki tum

tum shāḳh-e-gul se uḌ ke ga.e shāḳh-e-gul kī samt

apne nashemanoñ se judā ham hue ki tum

ustād sabr-o-nukta-shanās-e-razā the tum

lekin katīl-e-sabr-o-razā ham hue ki tum

sau baar rāste meñ luTā hai jo kārvāñ

us kārvāñ ke rāh-numā ham hue ki tum

paikān-e-neza-o-rasan-o-dār hai gavāh

sar de ke sar-buland-e-vafā ham hue ki tum

paimān-e-shauq kis ne nibāhā qadam qadam

aur haqq-e-āshiqī se adā ham hue ki tum

tum bhī nisār-e-dost the ham bhī nisār-e-dost

ḳhud faisla karo ki fidā ham hue ki tum

tum bhī julūs-e-mausam-e-gul meñ the pesh pesh

āvāra misl-e-bād-e-sabā ham hue ki tum

tum laakh ham-safar the par insāf to karo

yaaro halāk-e-laġhzish-e-pā ham hue ki tum

ye karbala hai nazr-e-bala hum hue ki tum

namus-e-qafila pe fida hum hue ki tum

kyun dajla-o-furaat ke dawe ki nahr par

tishna-dahan shahid-e-jafa hum hue ki tum

mana ki sab ajal ke muqabil the sar-ba-kaf

lekin shikar-e-tir-e-qaza hum hue ki tum

tum bhi fareb-KHurda sahi par ba-sad-KHulus

maqtul-e-makr-o-said-e-dagha hum hue ki tum

tum shaKH-e-gul se uD ke gae shaKH-e-gul ki samt

apne nashemanon se juda hum hue ki tum

ustad sabr-o-nukta-shanas-e-raza the tum

lekin katil-e-sabr-o-raza hum hue ki tum

sau bar raste mein luTa hai jo karwan

us karwan ke rah-numa hum hue ki tum

paikan-e-neza-o-rasan-o-dar hai gawah

sar de ke sar-buland-e-wafa hum hue ki tum

paiman-e-shauq kis ne nibaha qadam qadam

aur haqq-e-ashiqi se ada hum hue ki tum

tum bhi nisar-e-dost the hum bhi nisar-e-dost

KHud faisla karo ki fida hum hue ki tum

tum bhi julus-e-mausam-e-gul mein the pesh pesh

aawara misl-e-baad-e-saba hum hue ki tum

tum lakh ham-safar the par insaf to karo

yaro halak-e-laghzish-e-pa hum hue ki tum