ye karishma-sazi-e-ishq ki meri jaan zinda nazir hai

ye karishma-sāzī-e-ishq kī mirī jaan zinda nazīr hai

jo faqīr thā vo amiir hai jo amiir thā vo faqīr hai

mirī ḳhvāhishoñ kī bisāt par ye jo ek surḳh lakīr hai

yahī ik lakīr to asl meñ na.e mausamoñ kī safīr hai

na vo sar-zamīñ na vo āsmāñ magar aaj bhī sar-e-dasht-e-jāñ

vahī haath hai vahī mushk hai vahī pyaas hai vahī tiir hai

kisī lab pe harf-e-sitam to ho koī dukh supurd-e-qalam to ho

ye bajā ki shahr-e-malāl meñ koī 'faiz' hai koī 'mīr' hai

mere ham-suḳhan mire ham-zabāñ baḌe ḳhush-gumāñ baḌe ḳhush-bayāñ

koī ḳhvāhishoñ kā ġhulām hai koī zulf-o-ruḳh kā asiir hai

ye ajiib ruḳh hai hayāt kā nahīñ manziloñ se jo āshnā

vahī rāstoñ kā charāġh hai vahī qāfile kā amiir hai

ye karishma-sazi-e-ishq ki meri jaan zinda nazir hai

jo faqir tha wo amir hai jo amir tha wo faqir hai

meri KHwahishon ki bisat par ye jo ek surKH lakir hai

yahi ek lakir to asl mein nae mausamon ki safir hai

na wo sar-zamin na wo aasman magar aaj bhi sar-e-dasht-e-jaan

wahi hath hai wahi mushk hai wahi pyas hai wahi tir hai

kisi lab pe harf-e-sitam to ho koi dukh supurd-e-qalam to ho

ye baja ki shahr-e-malal mein koi 'faiz' hai koi 'mir' hai

mere ham-suKHan mere ham-zaban baDe KHush-guman baDe KHush-bayan

koi KHwahishon ka ghulam hai koi zulf-o-ruKH ka asir hai

ye ajib ruKH hai hayat ka nahin manzilon se jo aashna

wahi raston ka charagh hai wahi qafile ka amir hai