ye kashti-e-hayat ye tufan-e-hadsat

ye kashtī-e-hayāt ye tūfān-e-hādsāt

mujh ko to kuchh ḳhabar na rahī ār-pār kī

hai gardish-e-zamāna meñ do-rañgī-e-hayāt

ummīd kī sahar hai to shab intizār kī

ye dair ye haram ye kalīsā ye somnāt

tārīf kyā ho qudrat parvardigār kī

hai kaun jo uThā sake bār-e-ġham-e-hayāt

ham ne bhī gar qabā-e-ḳhirad taar taar kī

allāh re tasādum-e-hālāt-o-hādsāt

kī iḳhtiyār sañg ne sūrat sharār kī

zarroñ kī āb-o-tāb se tāroñ ne khaa.ī maat

ye ḳhūbiyāñ haiñ ḳhaak tire inkisār kī

ai 'ashk' zindagī meñ na pūchhī kisī ne baat

ab ḳhaak chūmte haiñ hamāre mazār kī

ye kashti-e-hayat ye tufan-e-hadsat

mujh ko to kuchh KHabar na rahi aar-par ki

hai gardish-e-zamana mein do-rangi-e-hayat

ummid ki sahar hai to shab intizar ki

ye dair ye haram ye kalisa ye somnat

tarif kya ho qudrat parwardigar ki

hai kaun jo uTha sake bar-e-gham-e-hayat

hum ne bhi gar qaba-e-KHirad tar tar ki

allah re tasadum-e-haalat-o-hadsat

ki iKHtiyar sang ne surat sharar ki

zarron ki aab-o-tab se taron ne khai mat

ye KHubiyan hain KHak tere inkisar ki

ai 'ashk' zindagi mein na puchhi kisi ne baat

ab KHak chumte hain hamare mazar ki