ye KHabar hai, mujh mein kuchh mere siwa maujud hai

ye ḳhabar hai, mujh meñ kuchh mere sivā maujūd hai

ab to bas ma.alūm karnā hai ki kyā maujūd hai

ek maiñ huuñ, jis kā honā ho ke bhī sābit nahīñ

ek vo hai jo na ho kar jā-ba-jā maujūd hai

haañ ḳhudā hai, is meñ koī shak kī gunjā.ish nahīñ

is se tum ye mat samajh lenā ḳhudā maujūd hai

hal kabhī hotā nahīñ ye jism se chhūTe baġhair

maiñ abhī zinda huuñ so ye mas.ala maujūd hai

taab āñkheñ lā sakeñ us husn kii, mumkin nahīñ

maiñ to hairāñ huuñ ki ab tak aa.ina maujūd hai

raat kaTtī hai maze meñ chain se hotī hai sub.h

chāñdnī maujūd hai bād-e-sabā maujūd hai

raushnī sī aa rahī hai is taraf chhantī huī

aur vo hiddat bhī jo zer-e-qabā maujūd hai

ek pal fursat kahāñ dete haiñ mujh ko mere ġham

ek ko bahlā diyā to dūsrā maujūd hai

dard kī shiddat meñ bhī chaltī hai mere dil ke saath

ik dhaḌaktī raushnī jo har jagah maujūd hai

mo'tabar to qais kā qissa bhī hai is zimn meñ

is havāle se mirā bhī vāqi.a maujūd hai

ḳhvāb meñ ik zaḳhm dekhā thā badan par jis jagah

sub.h dekhā to vahāñ ik daaġh sā maujūd hai

ek hī sho.ale se jalte aa rahe haiñ ye charāġh

'mīr' se mujh tak vahī ik silsila maujūd hai

yuuñ to hai 'irfān' har ehsās hī mahdūd sā

ik kasak sī hai ki jo be-intihā maujūd hai

ye KHabar hai, mujh mein kuchh mere siwa maujud hai

ab to bas malum karna hai ki kya maujud hai

ek main hun, jis ka hona ho ke bhi sabit nahin

ek wo hai jo na ho kar ja-ba-ja maujud hai

han KHuda hai, is mein koi shak ki gunjaish nahin

is se tum ye mat samajh lena KHuda maujud hai

hal kabhi hota nahin ye jism se chhuTe baghair

main abhi zinda hun so ye masala maujud hai

tab aankhen la saken us husn ki, mumkin nahin

main to hairan hun ki ab tak aaina maujud hai

raat kaTti hai maze mein chain se hoti hai subh

chandni maujud hai baad-e-saba maujud hai

raushni si aa rahi hai is taraf chhanti hui

aur wo hiddat bhi jo zer-e-qaba maujud hai

ek pal fursat kahan dete hain mujh ko mere gham

ek ko bahla diya to dusra maujud hai

dard ki shiddat mein bhi chalti hai mere dil ke sath

ek dhaDakti raushni jo har jagah maujud hai

mo'tabar to qais ka qissa bhi hai is zimn mein

is hawale se mera bhi waqia maujud hai

KHwab mein ek zaKHm dekha tha badan par jis jagah

subh dekha to wahan ek dagh sa maujud hai

ek hi shoale se jalte aa rahe hain ye charagh

'mir' se mujh tak wahi ek silsila maujud hai

yun to hai 'irfan' har ehsas hi mahdud sa

ek kasak si hai ki jo be-intiha maujud hai