یہ خوباں شہر کے ہم سے بہت ہشیاری کرتے ہیں

یہ خوباں شہر کے ہم سے بہت ہشیاری کرتے ہیں

ہمیں سادہ سمجھ کر خوب خوش گفتاری کرتے ہیں

بڑی مشکل سے توڑے ہیں یہ معمولات ہجر آخر

سو اک عرصہ ہوا دن میں ہی شب بیداری کرتے ہیں

نہیں پاتے در و دیوار میں گھر کی کوئی صورت

تو ہم گھر کے تصور میں در و دیواری کرتے ہیں

کہانی جو کراتی ہے وہی تو ہم کو کرنا ہے

بھلا ہو یا برا ہو ہم تو بس کرداری کرتے ہیں

ہمیں طیار ہونے کی ضرورت ہی نہیں پڑتی

کہ ساری زندگی مرنے کی ہی تیاری کرتے ہیں

تو ہم قانون شکنی کی طرح کرتے ہیں رات اپنی

سحر سے شام تک ہر کام جب سرکاری کرتے ہیں

شرابیں تو کلیدیں ہیں لہو کے قید خانوں کی

سو تالے توڑتے ہیں اور دریا جاری کرتے ہیں

سنا ہے تندرستی عشق میں اچھی نہیں ہوتی

چلو جی فرحت احساسؔ اب ذرا بیماری کرتے ہیں