ye kis ke aastane ki zamin malum hoti hai

ye kis ke āstāne kī zamīñ ma.alūm hotī hai

ki jumbish meñ mirī lauh-e-jabīñ ma.alūm hotī hai

do-rañgī dair-o-ka.aba kī nahīñ ma.alūm hotī hai

haqīqat āshnā merī jabīñ ma.alūm hotī hai

maiñ chāhūñ bhī to sañg-e-āstāñ se uTh nahīñ saktā

ki juzv-e-āstāñ apnī jabīñ ma.alūm hotī hai

davāñ hai kashtī-e-umr-e-ravāñ yuuñ bahr-e-hastī meñ

kahīñ ubhrī kahīñ Duubī kahīñ ma.alūm hotī hai

ye ik be-rabt sī jāma-darī aur apne hī hāthoñ

jahāñ pahle thā dāman āstīñ mālūm hotī hai

ye jalva-zār-e-duniyā bhī ajab ā.īna-ḳhāna hai

ki har tasvīr hairat-āfrīñ ma.alūm hotī hai

tajallī husn-e-jānāñ kī nahīñ mauqūf aiman par

jahāñ mahsūs kartā huuñ vahīñ ma.alūm hotī hai

nazar aate haiñ jalve vo jahāñ ke un kī chaukhaT par

ḳhudā.ī ab mire zer-e-nagīñ ma.alūm hotī hai

utar aayā hai naqsha āstān-e-yār kā 'afqar'

jabīn-e-shauq ab merī jabīñ ma.alūm hotī hai

ye kis ke aastane ki zamin malum hoti hai

ki jumbish mein meri lauh-e-jabin malum hoti hai

do-rangi dair-o-kaba ki nahin malum hoti hai

haqiqat aashna meri jabin malum hoti hai

main chahun bhi to sang-e-astan se uTh nahin sakta

ki juzw-e-astan apni jabin malum hoti hai

dawan hai kashti-e-umr-e-rawan yun bahr-e-hasti mein

kahin ubhri kahin Dubi kahin malum hoti hai

ye ek be-rabt si jama-dari aur apne hi hathon

jahan pahle tha daman aastin malum hoti hai

ye jalwa-zar-e-duniya bhi ajab aaina-KHana hai

ki har taswir hairat-afrin malum hoti hai

tajalli husn-e-jaanan ki nahin mauquf aiman par

jahan mahsus karta hun wahin malum hoti hai

nazar aate hain jalwe wo jahan ke un ki chaukhaT par

KHudai ab mere zer-e-nagin malum hoti hai

utar aaya hai naqsha aastan-e-yar ka 'afqar'

jabin-e-shauq ab meri jabin malum hoti hai