ye kis ke KHauf ka galiyon mein zahr phail gaya

ye kis ke ḳhauf kā galiyoñ meñ zahr phail gayā

ki ek na.ash ke mānind shahr phail gayā

nahīñ giraft meñ tā-hadd-e-ḳhāk kā manzar

simaT ga.iiñ mirī bāñheñ ki dahr phail gayā

tujhe qarīb samajhte the ghar meñ baiThe hue

tirī talāsh meñ nikle to shahr phail gayā

maiñ jis taraf bhī chalā jā.ūñ jaan se jā.ūñ

bichhaḌ ke tujh se to lagtā hai dahr phail gayā

makāñ makān se niklā ki jaise baat se baat

misāl-e-qissa-e-hijrāñ ye shahr phail gayā

bachā na koī tirī dhuup kī tamāzat se

tirā jamāl ba-andāz-e-qahr phail gayā

ye mauj mauj banī kis kī shakl sī 'tābish'

ye kaun Duub ke bhī lahr lahr phail gayā

ye kis ke KHauf ka galiyon mein zahr phail gaya

ki ek nash ke manind shahr phail gaya

nahin giraft mein ta-hadd-e-KHak ka manzar

simaT gain meri banhen ki dahr phail gaya

tujhe qarib samajhte the ghar mein baiThe hue

teri talash mein nikle to shahr phail gaya

main jis taraf bhi chala jaun jaan se jaun

bichhaD ke tujh se to lagta hai dahr phail gaya

makan makan se nikla ki jaise baat se baat

misal-e-qissa-e-hijran ye shahr phail gaya

bacha na koi teri dhup ki tamazat se

tera jamal ba-andaz-e-qahr phail gaya

ye mauj mauj bani kis ki shakl si 'tabish'

ye kaun Dub ke bhi lahr lahr phail gaya