ye kis ne kah diya aaKHir ki chhup-chhupa ke piyo

ye kis ne kah diyā āḳhir ki chhup-chhupā ke piyo

ye mai hai mai use auroñ ko bhī pilā ke piyo

ġham-e-jahāñ ko ġham-e-zīst ko bhulā ke piyo

hasīn giit mohabbat ke gungunā ke piyo

chhuTe na dāman-e-tā.at bhī vaqt-e-mai-noshī

piyo to sajda-e-ulfat meñ sar jhukā ke piyo

bujhe bujhe se hoñ armāñ to kyā faroġh-e-nashāt

jo so ga.e haiñ sitāre unheñ jagā ke piyo

ġham-e-hayāt kā darmāñ haiñ ishq ke aañsū

añdherī raat hai yaaro diye jalā ke piyo

nasīb hogī bahar-kaif marzī-e-sāqī

mile jo zahr bhī yaaro to muskurā ke piyo

mire ḳhulūs pe shaiḳh-e-haram bhī kah uTThā

jo pī rahe ho to 'darshan' haram meñ aa ke piyo

ye kis ne kah diya aaKHir ki chhup-chhupa ke piyo

ye mai hai mai use auron ko bhi pila ke piyo

gham-e-jahan ko gham-e-zist ko bhula ke piyo

hasin git mohabbat ke gunguna ke piyo

chhuTe na daman-e-taat bhi waqt-e-mai-noshi

piyo to sajda-e-ulfat mein sar jhuka ke piyo

bujhe bujhe se hon arman to kya farogh-e-nashat

jo so gae hain sitare unhen jaga ke piyo

gham-e-hayat ka darman hain ishq ke aansu

andheri raat hai yaro diye jala ke piyo

nasib hogi bahar-kaif marzi-e-saqi

mile jo zahr bhi yaro to muskura ke piyo

mere KHulus pe shaiKH-e-haram bhi kah uTTha

jo pi rahe ho to 'darshan' haram mein aa ke piyo