ye kya ki rang hathon se apne chhuDaen hum

ye kyā ki rang hāthoñ se apne chhuḌā.eñ ham

ilzām titliyoñ ke paroñ par lagā.eñ ham

hotī haiñ roz roz kahāñ aisī bārisheñ

aao ki sar se paañv talak bhiig jaa.eñ ham

uktā gayā hai saath ke in qahqahoñ se dil

kuchh roz ko bichhaḌ ke ab aañsū bahā.eñ ham

kab tak fuzūl logoñ pe ham tajrabe kareñ

kāġhaz ke ye jahāz kahāñ tak uḌā.īñ ham

kirdār-sāziyoñ meñ bahut kaam ā.eñge

bachchoñ ko vāqi'āt baḌoñ ke sunā.eñ ham

is kār-e-āgahī ko junūñ kah rahe haiñ log

mahfūz kar rahe haiñ fazā meñ sadā.eñ ham

'az.har' samā'ateñ haiñ latīfoñ kī muntazir

mahfil meñ apne she'r kise ab sunā.eñ ham

ye kya ki rang hathon se apne chhuDaen hum

ilzam titliyon ke paron par lagaen hum

hoti hain roz roz kahan aisi barishen

aao ki sar se panw talak bhig jaen hum

ukta gaya hai sath ke in qahqahon se dil

kuchh roz ko bichhaD ke ab aansu bahaen hum

kab tak fuzul logon pe hum tajrabe karen

kaghaz ke ye jahaz kahan tak uDain hum

kirdar-saziyon mein bahut kaam aaenge

bachchon ko waqi'at baDon ke sunaen hum

is kar-e-agahi ko junun kah rahe hain log

mahfuz kar rahe hain faza mein sadaen hum

'azhar' sama'aten hain latifon ki muntazir

mahfil mein apne she'r kise ab sunaen hum