ye kya ki tere hote bhi koi udas ho

ye kyā ki tere hote bhī koī udaas ho

jaise koī ri.āyatī number se paas ho

ye kyā ki harf-harf se Tapke havas kī raal

ye kyā ki sher-sher meñ jismoñ kī baas ho

ye kyā ġhilāf-e-zar se tū ka.aba lapeT de

ye kyā vajūd-e-ishq pe bār-e-libās ho

ye kyā ki ishq ho to phir is meñ na ho firāq

phal ho to phir zarūrī hai us meñ miThās ho

ye kyā ki mol bhī lage anmol bhī kaho

qīmat agarche laakh ho yā sau pachās ho

ye kyā ki ġhāzī aur shahīd ek naam leñ

ye kyā ḳhudā ke naam pe ḳhauf-o-hirās ho

ye kyā kisī ke vāste mela lagā rahe

ye kyā usī ke naam pe jiine kī aas ho

socho vajūd-e-lā se vo bhaTke yahāñ vahāñ

socho agar ḳhudā ko bhī tanhā.ī raas ho

ye kya ki tere hote bhi koi udas ho

jaise koi riayati number se pas ho

ye kya ki harf-harf se Tapke hawas ki ral

ye kya ki sher-sher mein jismon ki bas ho

ye kya ghilaf-e-zar se tu kaba lapeT de

ye kya wajud-e-ishq pe bar-e-libas ho

ye kya ki ishq ho to phir is mein na ho firaq

phal ho to phir zaruri hai us mein miThas ho

ye kya ki mol bhi lage anmol bhi kaho

qimat agarche lakh ho ya sau pachas ho

ye kya ki ghazi aur shahid ek nam len

ye kya KHuda ke nam pe KHauf-o-hiras ho

ye kya kisi ke waste mela laga rahe

ye kya usi ke nam pe jine ki aas ho

socho wajud-e-la se wo bhaTke yahan wahan

socho agar KHuda ko bhi tanhai ras ho