ye mana ki hasti nahin jawedani

ye maanā ki hastī nahīñ jāvedānī

mohabbat hai lekin mirī ġhair-fānī

zabāñ khul na paa.ī to dil kī kahānī

sunāte rahe āñsuoñ kī zabānī

mire ashk dāman se apne na poñchho

thamegī na ashkoñ kī phir ye ravānī

shikāyat nahīñ hai bhulā de agar tū

na aa yaad mujh ko baḌī mehrbānī

dil-e-zār kī tū ne fariyād āḳhir

na maanī mirī baat tū ne na maanī

gunāhoñ ke qābil na tiflī na piirī

na tauba pe maa.il hai apnī javānī

milā un ko jalva jo hosh apne kho.e

milī hosh-mandī ko bas lan-tarānī

nazar uTh rahī hai udhar gāhe-gāhe

zabāñ ban rahī hai mirī be-zabānī

gunahgār haiñ shaiḳh bachpan se shāyad

guzartī hai tauba meñ un kī javānī

kahānī kahīñ ban ga.ī hai haqīqat

haqīqat kahīñ ban ga.ī hai kahānī

mire haal par mehrbānī na kiije

yahī aap kī hai baḌī mehrbānī

mire naam par ḳhatm kar dī hai 'āmir'

vafāoñ kī chheḌī hai jis ne kahānī

ye mana ki hasti nahin jawedani

mohabbat hai lekin meri ghair-fani

zaban khul na pai to dil ki kahani

sunate rahe aansuon ki zabani

mere ashk daman se apne na ponchho

thamegi na ashkon ki phir ye rawani

shikayat nahin hai bhula de agar tu

na aa yaad mujh ko baDi mehrbani

dil-e-zar ki tu ne fariyaad aaKHir

na mani meri baat tu ne na mani

gunahon ke qabil na tifli na piri

na tauba pe mail hai apni jawani

mila un ko jalwa jo hosh apne khoe

mili hosh-mandi ko bas lan-tarani

nazar uTh rahi hai udhar gahe-gahe

zaban ban rahi hai meri be-zabani

gunahgar hain shaiKH bachpan se shayad

guzarti hai tauba mein un ki jawani

kahani kahin ban gai hai haqiqat

haqiqat kahin ban gai hai kahani

mere haal par mehrbani na kije

yahi aap ki hai baDi mehrbani

mere nam par KHatm kar di hai 'amir'

wafaon ki chheDi hai jis ne kahani