ye mana zindagi mein gham bahut hain

ye maanā zindagī meñ ġham bahut haiñ

hañse bhī zindagī meñ ham bahut haiñ

tirī zulfoñ ko kyā suljhā.ūñ ai dost

mirī rāhoñ meñ pech-o-ḳham bahut haiñ

nahīñ hai munhasir kuchh fasl-e-gul par

junūñ ke aur bhī mausam bahut haiñ

ġhubār-ālūda chehroñ par na jaanā

inhīñ meñ kīqabād-o-jam bahut haiñ

mujhe kuchh saaz hai nashtar se varna

mire zaḳhmoñ ke yaañ marham bahut haiñ

qafas ye jaan kar toḌā thā maiñ ne

qafas ko toḌ kar bhī ġham bahut haiñ

karūñ kyā chāra in āñkhoñ kā 'maikash'

ki un ke sāmne pur-nam bahut haiñ

ye mana zindagi mein gham bahut hain

hanse bhi zindagi mein hum bahut hain

teri zulfon ko kya suljhaun ai dost

meri rahon mein pech-o-KHam bahut hain

nahin hai munhasir kuchh fasl-e-gul par

junun ke aur bhi mausam bahut hain

ghubar-aluda chehron par na jaana

inhin mein kiqabaad-o-jam bahut hain

mujhe kuchh saz hai nashtar se warna

mere zaKHmon ke yan marham bahut hain

qafas ye jaan kar toDa tha main ne

qafas ko toD kar bhi gham bahut hain

karun kya chaara in aankhon ka 'maikash'

ki un ke samne pur-nam bahut hain