ye mahshar-e-soz-o-saz kya hai

ye mahshar-e-soz-o-sāz kyā hai

āḳhir mirā imtiyāz kyā hai

dil mahv-e-sadā-e-dard kyuuñ hai

ye arz-e-hunar-gudāz kyā hai

maf.hūm-e-navā-e-rāz kyā thā

āvāz-e-shikast-e-sāz kyā hai

Dartā huuñ ki apnā ġham na ho jaa.e

apne se ye ehtirāz kyā hai

pā kar bhī tujhe maiñ sochtā huuñ

miTne kā mire javāz kyā hai

ab tū jo milā to maiñ nahīñ huuñ

mujh se tirā imtiyāz kyā hai

kis kis ko bhulā chukā huuñ ai ġham

ye be-dilī-e-niyāz kyā hai

aksar to tirā burā bhī chāhā

kyā jāniye ḳhud pe naaz kyā hai

ye mahshar-e-soz-o-saz kya hai

aaKHir mera imtiyaz kya hai

dil mahw-e-sada-e-dard kyun hai

ye arz-e-hunar-gudaz kya hai

mafhum-e-nawa-e-raaz kya tha

aawaz-e-shikast-e-saz kya hai

Darta hun ki apna gham na ho jae

apne se ye ehtiraaz kya hai

pa kar bhi tujhe main sochta hun

miTne ka mere jawaz kya hai

ab tu jo mila to main nahin hun

mujh se tera imtiyaz kya hai

kis kis ko bhula chuka hun ai gham

ye be-dili-e-niyaz kya hai

aksar to tera bura bhi chaha

kya jaaniye KHud pe naz kya hai