ye main bhi kya hun use bhul kar usi ka raha

ye maiñ bhī kyā huuñ use bhuul kar usī kā rahā

ki jis ke saath na thā ham-safar usī kā rahā

vo but ki dushman-e-dīñ thā ba-qaul nāseh ke

savāl-e-sajda jab aayā to dar usī kā rahā

hazār chāragaroñ ne hazār bāteñ kiiñ

kahā jo dil ne suḳhan mo'tabar usī kā rahā

bahut sī ḳhvāhisheñ sau bārishoñ meñ bhīgī haiñ

maiñ kis tarah se kahūñ umr bhar usī kā rahā

ki apne harf kī tauqīr jāntā thā 'farāz'

isī liye kaf-e-qātil pe sar usī kā rahā

ye main bhi kya hun use bhul kar usi ka raha

ki jis ke sath na tha ham-safar usi ka raha

wo but ki dushman-e-din tha ba-qaul naseh ke

sawal-e-sajda jab aaya to dar usi ka raha

hazar chaaragaron ne hazar baaten kin

kaha jo dil ne suKHan mo'tabar usi ka raha

bahut si KHwahishen sau barishon mein bhigi hain

main kis tarah se kahun umr bhar usi ka raha

ki apne harf ki tauqir jaanta tha 'faraaz'

isi liye kaf-e-qatil pe sar usi ka raha