ye mat kaho ki bhiD mein tanha khaDa hun main

ye mat kaho ki bhiiḌ meñ tanhā khaḌā huuñ maiñ

Takrā ke ābgīne se patthar huā huuñ maiñ

āñkhoñ ke jañgaloñ meñ mujhe mat karo talāsh

dāman pe āñsuoñ kī tarah aa gayā huuñ maiñ

yuuñ be-ruḳhī ke saath na muñh pher ke guzar

ai sāhab-e-jamāl tirā aa.inā huuñ maiñ

yuuñ baar baar mujh ko sadā.eñ na dījiye

ab vo nahīñ rahā huuñ koī dūsrā huuñ maiñ

merī burā.iyoñ pe kisī kī nazar nahīñ

sab ye samajh rahe haiñ baḌā pārsā huuñ maiñ

vo bevafā samajhtā hai mujh ko use kaho

āñkhoñ meñ us ke ḳhvāb liye phir rahā huuñ maiñ

ye mat kaho ki bhiD mein tanha khaDa hun main

Takra ke aabgine se patthar hua hun main

aankhon ke jangalon mein mujhe mat karo talash

daman pe aansuon ki tarah aa gaya hun main

yun be-ruKHi ke sath na munh pher ke guzar

ai sahab-e-jamal tera aaina hun main

yun bar bar mujh ko sadaen na dijiye

ab wo nahin raha hun koi dusra hun main

meri buraiyon pe kisi ki nazar nahin

sab ye samajh rahe hain baDa parsa hun main

wo bewafa samajhta hai mujh ko use kaho

aankhon mein us ke KHwab liye phir raha hun main