ye maut-o-adam kaun-o-makan aur hi kuchh hai

ye maut-o-adam kaun-o-makāñ aur hī kuchh hai

sun le ki mirā nām-o-nishāñ aur hī kuchh hai

itnā to yaqīñ hai ki vahī haiñ tirī āñkheñ

is par bhī magar vahm-o-gumāñ aur hī kuchh hai

sho.aloñ meñ vo andāz kahāñ soz-e-nihāñ ke

uThtā hai jo dil se vo dhuāñ aur hī kuchh hai

ik kaifiyat-e-rāz hai ġham hai na masarrat

is bazm-e-mohabbat meñ samāñ aur hī kuchh hai

jo marhala-e-qurbat-o-dūrī se guzar jaa.e

sunte haiñ ki vo jazb-e-nihāñ aur hī kuchh hai

yā dard ke naġhmoñ meñ vahī hai tirī āvāz

yā parda-e-sāz-e-rag-e-jāñ aur hī kuchh hai

ye niiñd kā jhoñkā to nahīñ be-ḳhudī-e-ishq

hushyār ki vo ḳhvāb-e-girāñ aur hī kuchh hai

ab maut bhī hai gard-rah-e-kūcha-e-jānāñ

un manziloñ meñ umr-e-ravāñ aur hī kuchh hai

achchhe haiñ jahāñ haiñ magar ai dāman-e-jānāñ

paate haiñ jo tujh meñ vo amaañ aur hī kuchh hai

bijlī ke chamakne meñ kahāñ ishq kī garmī

vo shola-e-larzāñ-o-tapāñ aur hī kuchh hai

jo zaḳhm khilā de jo mirā rañg uḌā de

vo fasl-e-gul o fasl-e-ḳhizāñ aur hī kuchh hai

ik ḳhvāb-e-parīshāñ se haiñ is daur ke āsār

hushyār ki ab rañg-e-jahāñ aur hī kuchh hai

ik chiiz hai nairañgī-e-rudād-e-mohabbat

lekin ba-hadīs-e-digarāñ aur hī kuchh hai

shā.ir haiñ 'firāq' aur bhī is daur meñ lekin

ye rañg-e-bayāñ rañg-e-zabāñ aur hī kuchh hai

ye maut-o-adam kaun-o-makan aur hi kuchh hai

sun le ki mera nam-o-nishan aur hi kuchh hai

itna to yaqin hai ki wahi hain teri aankhen

is par bhi magar wahm-o-guman aur hi kuchh hai

shoalon mein wo andaz kahan soz-e-nihan ke

uThta hai jo dil se wo dhuan aur hi kuchh hai

ek kaifiyat-e-raaz hai gham hai na masarrat

is bazm-e-mohabbat mein saman aur hi kuchh hai

jo marhala-e-qurbat-o-duri se guzar jae

sunte hain ki wo jazb-e-nihan aur hi kuchh hai

ya dard ke naghmon mein wahi hai teri aawaz

ya parda-e-saz-e-rag-e-jaan aur hi kuchh hai

ye nind ka jhonka to nahin be-KHudi-e-ishq

hushyar ki wo KHwab-e-giran aur hi kuchh hai

ab maut bhi hai gard-rah-e-kucha-e-jaanan

un manzilon mein umr-e-rawan aur hi kuchh hai

achchhe hain jahan hain magar ai daman-e-jaanan

pate hain jo tujh mein wo aman aur hi kuchh hai

bijli ke chamakne mein kahan ishq ki garmi

wo shola-e-larzan-o-tapan aur hi kuchh hai

jo zaKHm khila de jo mera rang uDa de

wo fasl-e-gul o fasl-e-KHizan aur hi kuchh hai

ek KHwab-e-parishan se hain is daur ke aasar

hushyar ki ab rang-e-jahan aur hi kuchh hai

ek chiz hai nairangi-e-rudad-e-mohabbat

lekin ba-hadis-e-digaran aur hi kuchh hai

shair hain 'firaq' aur bhi is daur mein lekin

ye rang-e-bayan rang-e-zaban aur hi kuchh hai