ye mere shahr ka ek aur hadisa hoga

ye mere shahr kā ik aur hādisa hogā

vo kal yahāñ mirā mehmān ban chukā hogā

talāsh meñ huuñ kisī kī maiñ kab se sargardāñ

usī tarah koī mujh ko bhī DhūñDhtā hogā

mirī tarah se koī chīḳhtā hai rāhoñ meñ

mirī tarah koī duniyā ko dekhtā hogā

lagā ke aa.egā chehra koī nayā shab meñ

vo jis ko baiTh ke din meñ tarāshtā hogā

shanāsā chehre bhī lagne lage haiñ begāne

ab apnā vaqt hī shāyad badal rahā hogā

udaas udaas sā khoyā huā sā rahtā hai

kuchh us se bhī koī kah kar badal gayā hogā

thakā thakā sā usī dar pe aa ke baiThā thā

na pūchhā hogā kisī ne to chal diyā hogā

jahāñ pahuñch ke qadam Dagmagā.e haiñ sab ke

usī maqām se ab apnā rāsta hogā

ye mere shahr ka ek aur hadisa hoga

wo kal yahan mera mehman ban chuka hoga

talash mein hun kisi ki main kab se sargardan

usi tarah koi mujh ko bhi DhunDhta hoga

meri tarah se koi chiKHta hai rahon mein

meri tarah koi duniya ko dekhta hoga

laga ke aaega chehra koi naya shab mein

wo jis ko baiTh ke din mein tarashta hoga

shanasa chehre bhi lagne lage hain begane

ab apna waqt hi shayad badal raha hoga

udas udas sa khoya hua sa rahta hai

kuchh us se bhi koi kah kar badal gaya hoga

thaka thaka sa usi dar pe aa ke baiTha tha

na puchha hoga kisi ne to chal diya hoga

jahan pahunch ke qadam Dagmagae hain sab ke

usi maqam se ab apna rasta hoga