ye mez ye kitab ye diwar aur main

ye mez ye kitāb ye dīvār aur maiñ

khiḌkī meñ zard phūloñ kā ambār aur maiñ

har shaam is ḳhayāl se hotā hai jī udaas

panchhī to jā rahe haiñ ufuq paar aur maiñ

ik umr apnī apnī jagah par khaḌe rahe

ik dūsre ke ḳhauf se dīvār aur maiñ

sarkār har daraḳht se bante nahīñ haiñ taḳht

qurbān aap par mire auzār aur maiñ

le kar to aa gayā huuñ mire paas jo bhī thā

ab sochtā huuñ terā ḳharīdār aur maiñ

ḳhushbū hai ik fazāoñ meñ phailī huī jise

pahchānte haiñ sirf sag-e-yār aur maiñ

kho.e huoñ ko DhūñDne niklā thā āftāb

duniyā to mil ga.ī sar-e-bāzār aur maiñ

ye mez ye kitab ye diwar aur main

khiDki mein zard phulon ka ambar aur main

har sham is KHayal se hota hai ji udas

panchhi to ja rahe hain ufuq par aur main

ek umr apni apni jagah par khaDe rahe

ek dusre ke KHauf se diwar aur main

sarkar har daraKHt se bante nahin hain taKHt

qurban aap par mere auzar aur main

le kar to aa gaya hun mere pas jo bhi tha

ab sochta hun tera KHaridar aur main

KHushbu hai ek fazaon mein phaili hui jise

pahchante hain sirf sag-e-yar aur main

khoe huon ko DhunDne nikla tha aaftab

duniya to mil gai sar-e-bazar aur main