ye moajiza bhi dikhati hai sabz aag mujhe

ye mo.ajiza bhī dikhātī hai sabz aag mujhe

paroñ baġhair uḌātī hai sabz aag mujhe

maiñ āyatoñ kī tilāvat meñ mahv rahtā huuñ

har ik balā se bachātī hai sabz aag mujhe

har ek shāḳh pe rakhtī hai zard qindīleñ

phir us ke ba.ad jalātī hai sabz aag mujhe

meñ āb-e-surḳh meñ jab ḳhvāb tak pahuñchtā huuñ

to mere sāmne laatī hai sabz aag mujhe

hinā.ī paañv ragaḌte hue na ghaas pe chal

tujhe ḳhabar hai ki bhātī hai sabz aag mujhe

maiñ jab bhī jalte hue ko.eloñ pe sotā huuñ

to āsmāñ se bulātī hai sabz aag mujhe

zamīñ pe naag haiñ aur un ke muñh meñ ḳhvāb kī lau

kahāniyoñ se Darātī hai sabz aag mujhe

ye moajiza bhi dikhati hai sabz aag mujhe

paron baghair uDati hai sabz aag mujhe

main aayaton ki tilawat mein mahw rahta hun

har ek bala se bachati hai sabz aag mujhe

har ek shaKH pe rakhti hai zard qindilen

phir us ke baad jalati hai sabz aag mujhe

mein aab-e-surKH mein jab KHwab tak pahunchta hun

to mere samne lati hai sabz aag mujhe

hinai panw ragaDte hue na ghas pe chal

tujhe KHabar hai ki bhati hai sabz aag mujhe

main jab bhi jalte hue koelon pe sota hun

to aasman se bulati hai sabz aag mujhe

zamin pe nag hain aur un ke munh mein KHwab ki lau

kahaniyon se Daraati hai sabz aag mujhe