ye nadan zehn hai jo sochta hai

ye nādāñ zehn hai jo sochtā hai

ḳhalā meñ kyā kaheñ saut-o-sadā hai

qalam ne jo bhī kāġhaz par likhā hai

mire afkār kā vo aa.ina hai

ik aisā bhī hai paanī kā parinda

tah-e-qulzum pe jis kā ghoñsla hai

farishtoñ kī paḌho to hast rekhā

davām un ke muqaddar meñ likhā hai

utāreñge kabhī tauq-e-ġhulāmī

havāoñ kā fazāoñ ne kahā hai

zamīñ ko ab nahīñ pahlī sī harakat

qamar bhī duur hotā jā rahā hai

vahī nāzil huī hai āsmāñ se

ki har bachcha jahāñ kā devtā hai

tamām asrār kholegā vo apne

gagan dhartī kī jānib chal paḌā hai

ravābit is ke be-ma.anī haiñ saare

zamān-e-hāl se jo kaT gayā hai

muqayyad hī rahā huuñ ghar meñ apne

yugoñ se silsila ye chal rahā hai

jahāñ ko tañg-bīnī kā ye tohfa

falak kī vus.atoñ se kyā milā hai

'figār' ik paikar-e-hilm-o-tahammul

banā kar sab ke ghar meñ rakh diyā hai

ye nadan zehn hai jo sochta hai

KHala mein kya kahen saut-o-sada hai

qalam ne jo bhi kaghaz par likha hai

mere afkar ka wo aaina hai

ek aisa bhi hai pani ka parinda

tah-e-qulzum pe jis ka ghonsla hai

farishton ki paDho to hast rekha

dawam un ke muqaddar mein likha hai

utarenge kabhi tauq-e-ghulami

hawaon ka fazaon ne kaha hai

zamin ko ab nahin pahli si harakat

qamar bhi dur hota ja raha hai

wahi nazil hui hai aasman se

ki har bachcha jahan ka dewta hai

tamam asrar kholega wo apne

gagan dharti ki jaanib chal paDa hai

rawabit is ke be-mani hain sare

zaman-e-haal se jo kaT gaya hai

muqayyad hi raha hun ghar mein apne

yugon se silsila ye chal raha hai

jahan ko tang-bini ka ye tohfa

falak ki wusaton se kya mila hai

'figar' ek paikar-e-hilm-o-tahammul

bana kar sab ke ghar mein rakh diya hai