ye nafrat ka baghicha KHak kar den

ye nafrat kā baġhīcha ḳhaak kar deñ

chalo ham apnā ġhussa ḳhaak kar deñ

kuchh ik kirdār itrāne lage haiñ

ye goyā saarā qissa ḳhaak kar deñ

hamāre paaoñ ke chhāle na dekho

hameñ batlāo rasta ḳhaak kar deñ

hamīñ ne dasht se zamzam nikālā

jo ham chāheñ to dariyā ḳhaak kar deñ

hameñ Dar hai jinheñ mansab milā hai

kahīñ vo hī na naqsha ḳhaak kar deñ

ye ik din apnī kamzorī banegī

chalo sab fitna vitnā ḳhaak kar deñ

mohabbat kis tarah sābit kareñ ham

batā ab ḳhud ko kitnā ḳhaak kar deñ

adab itnā ki qadmoñ meñ paḌe haiñ

anā itnī ki lanka ḳhaak kar deñ

tujhe to ḳhaak kar hī deñge ik din

magar pahle ye rishta ḳhaak kar deñ

ye nafrat ka baghicha KHak kar den

chalo hum apna ghussa KHak kar den

kuchh ek kirdar itrane lage hain

ye goya sara qissa KHak kar den

hamare paon ke chhaale na dekho

hamein batlao rasta KHak kar den

hamin ne dasht se zamzam nikala

jo hum chahen to dariya KHak kar den

hamein Dar hai jinhen mansab mila hai

kahin wo hi na naqsha KHak kar den

ye ek din apni kamzori banegi

chalo sab fitna witna KHak kar den

mohabbat kis tarah sabit karen hum

bata ab KHud ko kitna KHak kar den

adab itna ki qadmon mein paDe hain

ana itni ki lanka KHak kar den

tujhe to KHak kar hi denge ek din

magar pahle ye rishta KHak kar den