ye nahr-e-ab bhi uski hai mulk-e-sham us ka

ye nahr-e-āb bhī us kī hai mulk-e-shām us kā

jo hashr mujh pe bapā hai vo ehtimām us kā

sipāh-e-tāza bhī us kī saf-e-nigāh se hai

safā-e-sīna-e-shmshīr par hai naam us kā

amaan ḳhema-e-ram-ḳhurdgāñ meñ baaqī hai

ki nā-tamām hai ik shauq-e-qatl-e-ām us kā

kitāb-e-umr se sab harf uḌ ga.e mere

ki mujh asiir ko honā hai ham-kalām us kā

dil-e-shikasta ko laanā hai rū-ba-rū us ke

jo mujh se narm huā koī band daam us kā

maiñ us ke haath se kis zaḳhm meñ kamī rakkhūñ

shurū-e-nāz bhī us kā hai iḳhtitām us kā

ye nahr-e-ab bhi us ki hai mulk-e-sham us ka

jo hashr mujh pe bapa hai wo ehtimam us ka

sipah-e-taza bhi us ki saf-e-nigah se hai

safa-e-sina-e-shmshir par hai nam us ka

aman KHema-e-ram-KHurdgan mein baqi hai

ki na-tamam hai ek shauq-e-qatl-e-am us ka

kitab-e-umr se sab harf uD gae mere

ki mujh asir ko hona hai ham-kalam us ka

dil-e-shikasta ko lana hai ru-ba-ru us ke

jo mujh se narm hua koi band dam us ka

main us ke hath se kis zaKHm mein kami rakkhun

shuru-e-naz bhi us ka hai iKHtitam us ka