ye naqsh hum jo sar-e-lauh-e-jaan banate hain

ye naqsh ham jo sar-e-lauh-e-jāñ banāte haiñ

koī banātā hai ham ḳhud kahāñ banāte haiñ

ye sur ye taal ye lai kuchh nahīñ ba-juz taufīq

to phir ye kyā hai ki ham armuġhāñ banāte haiñ

samundar us kā havā us kī āsmāñ us kā

vo jis ke izn se ham kashtiyāñ banāte haiñ

zamīñ kī dhuup zamāne kī dhuup zehn kī dhuup

ham aisī dhuup meñ bhī sā.ebāñ banāte haiñ

ḳhud apnī ḳhaak se karte haiñ mauj-e-nūr kashīd

phir us se ek na.ī kahkashāñ banāte haiñ

kahānī jab nazar aatī hai ḳhatm hotī huī

vahīñ se ek na.ī dāstāñ banāte haiñ

khulī fazā meñ ḳhush-āvāz tā.eroñ ke hujūm

magar vo log jo tiir o sināñ banāte haiñ

palaT ke aa.e ġharīb-ul-vatan palaTnā thā

ye dekhnā hai ki ab ghar kahāñ banāte haiñ

ye naqsh hum jo sar-e-lauh-e-jaan banate hain

koi banata hai hum KHud kahan banate hain

ye sur ye tal ye lai kuchh nahin ba-juz taufiq

to phir ye kya hai ki hum armughan banate hain

samundar us ka hawa us ki aasman us ka

wo jis ke izn se hum kashtiyan banate hain

zamin ki dhup zamane ki dhup zehn ki dhup

hum aisi dhup mein bhi saeban banate hain

KHud apni KHak se karte hain mauj-e-nur kashid

phir us se ek nai kahkashan banate hain

kahani jab nazar aati hai KHatm hoti hui

wahin se ek nai dastan banate hain

khuli faza mein KHush-awaz taeron ke hujum

magar wo log jo tir o sinan banate hain

palaT ke aae gharib-ul-watan palaTna tha

ye dekhna hai ki ab ghar kahan banate hain