ye nigah-e-sharm jhuki jhuki ye jabin-e-naz dhuan dhuan

ye nigāh-e-sharm jhukī jhukī ye jabīn-e-nāz dhuāñ dhuāñ

mire bas kī ab nahīñ dāstāñ mirā kāñptā hai ruvāñ ruvāñ

ye taḳhaiyyulāt kī zindagī ye tasavvurāt kī bandagī

faqat ik fareb-e-ḳhayāl par mirī zindagī hai ravāñ davāñ

mire dil pe naqsh haiñ aaj tak vo ba-ehtiyāt navāzisheñ

vo ġhurūr o- zabt ayaañ ayaañ vo ḳhulūs o rabt nihāñ nihāñ

na safar ba-shart-e-ma.āl hai na talab ba-qaid-e-savāl hai

faqat ek serī-e-zauq ko maiñ bhaTak rahā huuñ kahāñ kahāñ

ho tilism-e-ālam-e-rañg-o-bū ki harīm-e-anjum-o-kahkashāñ

mirā saath degī nazar mirī vo chhupeñge jā ke jahāñ jahāñ

mirī ḳhalvatoñ kī ye jannateñ ka.ī baar saj ke ujaḌ ga.iiñ

mujhe bārhā ye huā gumāñ ki tum aa rahe ho kashāñ kashāñ

ye nigah-e-sharm jhuki jhuki ye jabin-e-naz dhuan dhuan

mere bas ki ab nahin dastan mera kanpta hai ruwan ruwan

ye taKHaiyyulat ki zindagi ye tasawwuraat ki bandagi

faqat ek fareb-e-KHayal par meri zindagi hai rawan dawan

mere dil pe naqsh hain aaj tak wo ba-ehtiyat nawazishen

wo ghurur o- zabt ayan ayan wo KHulus o rabt nihan nihan

na safar ba-shart-e-maal hai na talab ba-qaid-e-sawal hai

faqat ek seri-e-zauq ko main bhaTak raha hun kahan kahan

ho tilism-e-alam-e-rang-o-bu ki harim-e-anjum-o-kahkashan

mera sath degi nazar meri wo chhupenge ja ke jahan jahan

meri KHalwaton ki ye jannaten kai bar saj ke ujaD gain

mujhe barha ye hua guman ki tum aa rahe ho kashan kashan