ye paiham talKH-kaami si rahi kya

ye paiham talḳh-kāmī sī rahī kyā

mohabbat zahr khā ke aa.ī thī kyā

mujhe ab tum se Dar lagne lagā hai

tumheñ mujh se mohabbat ho ga.ī kyā

shikast-e-e'timād-e-zāt ke vaqt

qayāmat aa rahī thī aa ga.ī kyā

mujhe shikva nahīñ bas pūchhnā hai

ye tum hañstī ho apnī hī hañsī kyā

hameñ shikva nahīñ ik dūsre se

manānā chāhiye us par ḳhushī kyā

paḌe haiñ ek gosh meñ gumāñ ke

bhalā ham kyā hamārī zindagī kyā

maiñ ruḳhsat ho rahā huuñ par tumhārī

udāsī ho ga.ī hai multavī kyā

maiñ ab har shaḳhs se uktā chukā huuñ

faqat kuchh dost haiñ aur dost bhī kyā

mohabbat meñ hameñ pās-e-anā thā

badan kī ishtihā sādiq na thī kyā

nahīñ rishta samūcha zindagī se

na jaane ham meñ hai apnī kamī kyā

abhī hone kī bāteñ haiñ so kar lo

abhī to kuchh nahīñ honā abhī kyā

yahī pūchhā kiyā maiñ aaj din-bhar

har ik insān ko roTī milī kyā

ye rabt-e-be-shikāyat aur ye maiñ

jo shai siine meñ thī vo bujh ga.ī kyā

ye paiham talKH-kaami si rahi kya

mohabbat zahr kha ke aai thi kya

mujhe ab tum se Dar lagne laga hai

tumhein mujh se mohabbat ho gai kya

shikast-e-e'timad-e-zat ke waqt

qayamat aa rahi thi aa gai kya

mujhe shikwa nahin bas puchhna hai

ye tum hansti ho apni hi hansi kya

hamein shikwa nahin ek dusre se

manana chahiye us par KHushi kya

paDe hain ek gosh mein guman ke

bhala hum kya hamari zindagi kya

main ruKHsat ho raha hun par tumhaari

udasi ho gai hai multawi kya

main ab har shaKHs se ukta chuka hun

faqat kuchh dost hain aur dost bhi kya

mohabbat mein hamein pas-e-ana tha

badan ki ishtiha sadiq na thi kya

nahin rishta samucha zindagi se

na jaane hum mein hai apni kami kya

abhi hone ki baaten hain so kar lo

abhi to kuchh nahin hona abhi kya

yahi puchha kiya main aaj din-bhar

har ek insan ko roTi mili kya

ye rabt-e-be-shikayat aur ye main

jo shai sine mein thi wo bujh gai kya