ye phul jo miTTi ke hayulon se aTa hai

ye phuul jo miTTī ke hayūloñ se aTā hai

maazī kā koī ḳhvāb hai mānūs sadā hai

sūkhā huā pattā huuñ ki be-Dāl paḌā huuñ

kyā jāniye kis ke liye ye jog liyā hai

ai ḳhār-e-chaman-zār munajjim to nahīñ tū

fardā kā har ik raaz tire lab se sunā hai

pūchho ye sitāroñ se ki tauzīh kareñ vo

kyuuñ laash pe yuuñ chāñd kī mātam sā bapā hai

dukhte hue dil se ka.ī shahkār nikāle

is daur ko ham ne hī ziyā-pāsh kiyā hai

jam bhī vahī daarā bhī sikandar bhī vahī hai

jī kar bhī tirā aur jo mar kar bhī tirā hai

tū mujh se gurezāñ hai to maiñ tujh pe huuñ qurbāñ

ishva hai jo vo terā to ye merī adā hai

fankār ne samjhā na muġhannī hī ne samjhā

jo sirr-e-nihāñ ek qalandar ne kahā hai

maiñ phir bhī 'azīm' us kī adāoñ pe miTā huuñ

jo marg kā unvāñ mirī hastī kī baqā hai

ye phul jo miTTi ke hayulon se aTa hai

mazi ka koi KHwab hai manus sada hai

sukha hua patta hun ki be-Dal paDa hun

kya jaaniye kis ke liye ye jog liya hai

ai KHar-e-chaman-zar munajjim to nahin tu

farda ka har ek raaz tere lab se suna hai

puchho ye sitaron se ki tauzih karen wo

kyun lash pe yun chand ki matam sa bapa hai

dukhte hue dil se kai shahkar nikale

is daur ko hum ne hi ziya-pash kiya hai

jam bhi wahi dara bhi sikandar bhi wahi hai

ji kar bhi tera aur jo mar kar bhi tera hai

tu mujh se gurezan hai to main tujh pe hun qurban

ishwa hai jo wo tera to ye meri ada hai

fankar ne samjha na mughanni hi ne samjha

jo sirr-e-nihan ek qalandar ne kaha hai

main phir bhi 'azim' us ki adaon pe miTa hun

jo marg ka unwan meri hasti ki baqa hai