ye raat Dhalte Dhalte rakh gai jawab ke liye

ye raat Dhalte Dhalte rakh ga.ī javāb ke liye

ki terī āñkheñ jāgtī haiñ kis ke ḳhvāb ke liye

kitāb dil pe likhne kī ijāzat us ne dī na thī

hai saada aaj bhī varaq ye intisāb ke liye

mirī nazar meñ aa gayā hai jab se ik sahīfa-ruḳh

kashish rahī na dil meñ ab kisī kitāb ke liye

hamārī mahzar-e-amal hai zer-e-faisla abhī

khaḌe haiñ sar jhukā.e kab se ehtisāb ke liye

purāne paḌ chuke kabhī ke sab tarīqa-e-sitam

ḳharābī aur chāhiye dil-e-ḳharāb ke liye

samajh rahe haiñ sab yahāñ hai zindagī azāb-e-jāñ

magar ye bhāg-dauḌ hai isī azaab ke liye

tamām jism zaḳhmoñ se gulāb-zār ho gayā

to laḌ rahe haiñ 'anjum' ab ye kis gulāb ke liye

ye raat Dhalte Dhalte rakh gai jawab ke liye

ki teri aankhen jagti hain kis ke KHwab ke liye

kitab dil pe likhne ki ijazat us ne di na thi

hai sada aaj bhi waraq ye intisab ke liye

meri nazar mein aa gaya hai jab se ek sahifa-ruKH

kashish rahi na dil mein ab kisi kitab ke liye

hamari mahzar-e-amal hai zer-e-faisla abhi

khaDe hain sar jhukae kab se ehtisab ke liye

purane paD chuke kabhi ke sab tariqa-e-sitam

KHarabi aur chahiye dil-e-KHarab ke liye

samajh rahe hain sab yahan hai zindagi azab-e-jaan

magar ye bhag-dauD hai isi azab ke liye

tamam jism zaKHmon se gulab-zar ho gaya

to laD rahe hain 'anjum' ab ye kis gulab ke liye